ދެކުނު ޗައިނާ ކަނޑާއި އިރުމަތީ ޗައިނާ ކަނޑުގެ މަސްރަޙު ހޫނުވެ، ޓައިވާނާއި ޗައިނާއާ ދެމެދު އަސްކަރީ ވާދަވެރިން އިތުރުވަމުންދާ ދަނޑިވަޅެއްގައި އެމެރިކާއިން ވަނީ ބައި ބިލިއަން ޑޮލަރުގެ ހަތިޔާރު ޓައިވާނަށް ވިއްކުމަށް ނިންމާފައެވެ.
ޗައިނާއިން ބުނެފައި ވަނީ އެމރިކާގެ މިފިޔަވަޅަކީ، އެއް ޗައިނާގެ ސިޔާސަތާއި ޗައިނާއާއި އެމެރިކާއާ ދެމެދު ސޮއިކޮށްފައިވާ 3 ފަހުމުނާމާގެ ރޫހާ ޚިލާފަށް އެމެރިކާއިން އަޅާ ފިޔަވަޅެއް ކަމަށެވެ.
2016 ވަނަ އަހަރުން ފެށިގެން ޓައިވާންގެ ވެރިކަން ކުރަމުންދާ ޕާޓީއަކީ ޗައިނާއަށް ހަތުރުވެރި، އަދި ޓައިވާންގެ މިނިވަންކަމަށް ބާރުއަޅާ ޕާޓީއެކެވެ. ޗައިނާއިން ބުނެފައި ވަނީ ޓައިވާނަށް މިނިވަން ވުމަށް ފުރުސަތެއް ނެތް ކަމަށެވެ. އަދި ޓައިޥާނަކީ ބާޣީ ޕްރޮވިންސެއް ކަމަށާއި ބޭނުން ޖެހިއްޖެ ހިނދެއްގައި ޓައިވާން ޗައިނާއާ އެއްކޮށްލުމަކީ ބެއިޖިންގއަށް ކުރެވިދާނެ ކަމެއް ކަމަށެވެ.
ޗައިނާއިން ވަނީ ވެރިކަން ކުރާ ޕާޓީއަށް ދަތުކުރުމަށްޓަކައި ޓައިވާން ކަނޑުއޮޅީގައި އަސްކަރީ ހަރަކާތްތައްތައް އިތުރު ކޮށްފައެވެ.
ޓައިވާނަށް ހަތިޔާރު ވިއްކުމަކީ އެމެރިކާގެ މަސްލަޙަތަށް ފައިދާއެއް އޮތް ކަމެއް ނޫން ކަމަށް ޗައިނާއިން ބުނެއެވެ. އެމެރިކާއިން މީގެ ކުރިންވެސް ޓައިވާނަށް ހަތިޔާރު ވިއްކުމަށް ވަޢުދުވެފައި ވެއެވެ. މިހާރުވެސް 20 ބިލިއަން ޑޮލަރުގެ ހަތިޔާރު އެމެރިކާއިން ޓައިވާނަށް ލިބެން ޖެހެއެވެ. ނަމަވެސް އެތަކެތި ސަޕްލައި ކޮށްދެވޭނެ ދުވަހެއް ނޭނގެއެވެ.
