އީރާނުން ޒަޔަނިސްޓުންނަށް ދިން ޙަމަލަ ދީފައި ވަނީ 3 ތަނަކަށް އަމާޒުކޮށްގެންނެވެ. އެއިން އެއް ތަނަކީ ޒަޔަނިސްޓުންގެ ޖާސޫސީ އިދާރާ މޮސާޑްގެ މައި މަރުކަޒެވެ. އަނެއް ދެ ތަނަކީ، ވައިގެ ސިފައިންގެ ދެ މަރުކަޒެވެ.
އީރާނުން މި ޙަމަލަތައް ދޭން ބޭނުން ކުރާ މިސައިލްގެ އަދަދާއި ހަމަލަތައް އަމާޒު ކުރާނެ ތަންތަން ދުރާލައި އެންގިއެވެ. ނަމަވެސް އެމެރިކާއަށް އެ މަޢުލޫމާތެއް ނުދެއެވެ. އެހެންނަމަވެސް ޙަމަލަ ފެށުމާއެކު ތެހެރާންގައި ހުންނަ އެމެރިކާގެ މަސްލަހަތު ބަލަހައްޓާ ސުއިޒަރލެންޑް އެމްބަސީ މެދުވެރިކޮށް އެމެރިކާއަށް ދިން އިންޒާރުގައި ބުނެފައި ވަނީ އެމެރިކާއިން މި ޙަމަލަތަކުގެ ތެރެއަށް ވަދެފިނަމަ ބަދަލު ހިފާނެ ކަމަށެވެ.
ހަމަލަތައް ދެމުން ދިޔައިރު، އިޒްރޭލަށް ވާގި ވެރިވުމުގެ ގޮތުން ހަރަކާތްތެރިވީ އިނގިރޭސިވިލާތުން ނެވެ. ސައިޕްރައިސްގައި ތިބޭ އިނގިރޭސި ސިފައިން ވަނީ ހަރަކާތްތެރި ކުރުވާފައެވެ.
އީރާނުގެ ޙަމަލަތައް ކާމިޔާބު ވުމާއެކު އިޒްރޭލު ސިފައިން ރައްޔިތުންނަށް އަންގާފައިވަނީ މިސައިލް ވެއްޓިފައިވާ އެއްވެސް ތަނަކާއި މިސައިލުން ގެއްލުމެއް ލިބިފައިވާ އެއްވެސް ތަނެއްގެ މަންޒަރު މީސްމީޑިއާގައި ހިއްސާ ކުރުމަކީ މަނާކަމެއް ކަމަށެވެ. އަދި އިޒްރޭލުން ވަނީ އެކަން ކޮންޓްރޯލު ކޮށްފައެވެ. އަލްޖަޒީރާ މީޑިއާ އިޒްރޭލުން ބޭރު ކުރުމަށްފަހުވެސް އިޒްރޭލުން ވަނީ ޒަޔަނިސްޓުންނާ ބެހޭ އެއްވެސް މަންޒަރެއް އާންމުކޮށް ހިއްސާނުކުރުމަށް އަންގާފައެވެ.
އެމެރިކާއަށް މިއަދުވެސް އީރާނުން ވަނީ އިންޒާރު ދީފައެވެ. އީރާނުން ބުނެފައި ވަނީ އީރާނާ ދެކޮޅަށް ޙަމަލައެއް ދީފައިނަމަ އަދި އެޙަމަލާގައި އެމެރިކާއާއި ހުޅަނގުގެ އިސްތިއުމާރީ ބާރަކުން ބައިވެރިވެއްޖެނަމަ، މެދުއިރުމަތިން އެންމެ ތެޔޮ ފޮދެއްވެސް ބޭރުވެގެން ނުދާނެ ކަމަށެވެ. އަދި ފާރިސީ ކަނޑު އޮޅި އެއްކޮށް ބަންދު ކުރާނެ ކަމަށެވެ. އަދި ކުރިއަސް އޮތީ ފިނިމޫސުން ކަން ދަނެގެން މިއިންޒާރު ސީރިއަސް ކޮށް ނެގުމަށް ވަނީ ނަސޭހަތްތެރިވެފައެވެ.
އީރާނުގެ އިންފޮމޭޝަން މިނިސްޓްރީން ވަނީ އެޤައުމުން ނައްތާލަން ބޭނުންވާ ޔަހޫދީ ޒަޔަނިސްޓުންގެ ލިސްޓެއް އާންމު ކޮށްފައެވެ. އޭގައި އެންމެ ކުރީގައި އުޅެނީ ޒަޔަނިސްޓުންގެ ބޮޑު މީހާ ނަތަންޔާހޫއެވެ.
