ޒަޔަނިސްޓުންނާ ދެކޮޅަށް އީރާނުން ދީފައިވާ ޙަމަލާގައި ބޭނުން ކޮށްފައިވަނީ އަޑަށް ވުރެން ބާރަށް ދަތުރުކުރާ ބެލެސްޓިކް މިސައިލެވެ. މި ހަމަލާގައި ބޭނުންކޮށްފައިވާ އީރާނުން އުފައްދާފައިވާ އަލްފައްތާޙް މިސައިލަކީ، އަޑަށް ވުރެން ފަސް ގުނަ ބާރަށް ދަތުރު ކުރާ މިސައިލެކެވެ. މިއީ ދުނިޔޭގެ ފަށަލައާއި ދުނިޔޭގެ ފަށަލައިން ބޭރުގައިވެސް ޙަރަކާތްތެރިވެވޭ އަދި ރޭޑާއަށް ނާރާ ފަދަ މިސައިލެކެވެ.
އީރާނުން ދެ ވައްތަރެއްގެ ހަކަތަ ބޭނުންކުރާ ބެލެސްޓިކް މިސައިލް ބޭނުން ކުރެއެވެ. އެއީ ސޮލިޑް ފިއުލްއާއި ދިޔާ ފިއުލް ބޭނުން ކުރާ ވައްތަރުގެ މިސައިލްތަކެވެ. ސޮލިޑް ފިއުލް ބޭނުން ކުރާ މިސައިލަކީ އޭތި ތައްޔާރު ކުރުމަށް ވަގުތު ނަގާ މިސައިލެއް ނޫނެވެ.
އީރާނުން އަލްފައްތާޙްގެ އިތުރުން ދުރުރާސްތާއަށް ފޯރާ އެހެން އެތައް މިސައިލެއްވެސް ގެންގުޅެއެވެ.
ޚައިބަރު މިސައިލަކީ 1 ޓަނުގެ ގޮވާތަކެތި ހަރުކޮށްފައިވާ ބޮލަކާއެކު 1242 މޭލަށް ފޯރާ ވަރުގެ ބެލެސްޓިކް މިސައިލެކެވެ. މިއީ މެދުއިރުމަތީގެ ހުރިހައި ޤައުމަކަށް ވެސް ފޯރާ ވަރުގެ މިސައިލެކެވެ.
ސިއްޖީލު ބެލެސްޓިކް މިސައިލަކީ 500 ކިލޯގެ ގޮވާ ތަކެއްޗާއެކު 2500 ކިލޯމީޓަރަށް ދަތުރުކުރާ މިސައިލެކެވެ.
ހާއްޖު ޤާސިމް ބެލެސްޓިކް މިސައިލަކީ، 500 ކިލޯގެ ގޮވާތަކެއްޗާއެކު 1400 ކިލޯމީޓަރަށް ފޯރާ ވަރުގެ މިސައިލެކެވެ.
ޚުއްރަމް ޝެހެރް ބެލެސްޓިކް މިސައިލަކީ 1800 ކިލޯގެ ގޮވާތަކެއްޗާއެކު ދެ ހާސް ކިލޯމީޓަރަށް ފޯރާވަރުގެ މިސައިލެކެވެ.
ޒަޔަނިސްޓުންނާ ދެކޮޅަށް ބޭނުންކޮށްފައިވާ އަލްފައްތާޙު މިސައިލް ވަނީ 6 މިނެޓްގެ ތެރޭގައި 1400 ކިލޯމީޓަރަށް ފޯރާފައެވެ.
