އިންޑިއާގެ ފަނޑިޔާރަކު ލަވް ޖިހާދު މާނަކޮށްދީފައި، މުސްލިމަކު އުމުރަށް ޖަލަށް ލާން ޙުކުމް ކޮށްފިއެވެ. ލަވް ޖިހާދަކީ އިންޑިއާގެ ބީޖޭޕީއާއި ބީޖޭޕީއާއި ގުޅިފައިވާ އިސްލާމޯފޯބިއާއަށް ހިތްވަރު ދޭ ފަރާތްތަކުން މުސްލިމުން ހިންދޫންނާ ކައިވެނި ކުރާތީ ކުރާ ޕްރޮޕެގެންޑާއެކެވެ.
އިންޑިއާގެ އުއްތަރަ ޕްރަދޭޝްގައި ވެރިކަން ކުރާ ބީޖޭޕީގެ ޔޯގީ ސަރުކާރަކީ މުސްލިމުންނާ ހަތުރުވެރިކަމުގައި ހައްދުފަހަނައަޅާފައިވާ ސަރުކާރެކެވެ.
މުސްލިމުން ހިންދީންނާ ކައިވެނި ކުރަނީ ޖިހާދެއްގެ ގޮތުގައި ކަމަށް ބުނާ ވާހަކައަށް ބުރަދަނެއް ދެމުން، އިންޑިއާގެ ޔޫޕީގެ ކޯޓުން ލަވް ޖިހާދު މާނަ ކުރަމުން ބުންޏެވެ.
"ލަވް ޖިހާދުގައި މުސްލިމު ފިރިހެން މީހާ ހިންދޫ އަންހެން ކުއްޖާއާ ކައިވެނިކޮށްގެން އަތުއަޅުވާލަން ނިޒާމީގޮތެއްގައި އަމާޒުކޮށް އޭނާ ދީނަށް ވައްދަން އުޅޭނެއެވެ. އަދި (ލަވް ޖިހާދު ބޭނުންކޮށްގެން) މަކަރުވެރިކަމާއެކު މުސްލިމުން ހިންދޫ އަންހެނުންނާ ކައިވެނިކުރާނީ އެމީހުން ދެކެ ލޯބިވާކަމަށް ހެދިގެން އެމީހުން ދީނަށް ވެއްދުމަށްޓަކައެވެ." އިންޑިއާގެ ކޯޓުތަކުގެ ނިންމުންތައް ގެނެސްދޭ ލައިވް ލޯގައި މި މައްސަލަ ހިނގައި ދިޔަ ގޮތް ކިޔައި ދެމުން، ފަނޑިޔާރު މާނަކޮށްދިން ގޮތް ގެނަސްދީފައި ވެއެވެ.
މުސްލިމު ފިރިހެން މީހާ އުމުރަށް ޖަލަށް ލާން ޙުކުމް ކުރި ޝަރީޢަތުގައި އަންހެން މީހާ ތަކުރާރުކޮށް ކޯޓުގައި ބުނެފައި ވަނީ، 2023ގައި މި ދައުވާ ހުށަހަޅާފައިވަނީ އޭނާގެ މައިންބަފައިންނާއި ހިންދީ ޖަމުއިއްޔާތަކުން އޭނާގެ ގެއަށް އައިސް އާއިލާއާއި އޭނާއަށް ފިއްތައިގެން ކަމަށެވެ. ނަމަވެސް ޤާޒީ ރަވީ ކުމާރު ދިވާކަރު ވިދާޅުވީ، އަންހެން މީހާ އެގޮތަށް ކޯޓުގައި ވާހަކަ ދައްކަމުން ގެންދަނީ މުޙައްމަދު ޢާލަމް އޭނާއަށް ފިއްތުންތައް ކުރިމަތިކޮށްފައި އޮތުމުން ކަމަށެވެ.
މައްސަލަ ބެއްލެވި ފަނޑިޔާރު، ދިވާކަރު ވަނީ އަންހެން މީހާގެ ވާހަކަ ބަލައިގަތުމަށް ދެކޮޅު ހައްދަވާފައެވެ. ރަވީ ކުމާރުގެ ޙުކުމަށްވެސް މީހުން ވަނީ މީސްމީޑިއާގައި ފާޑު ކިޔާފައެވެ.
"އަންހެން މީހާ އެކަނި ގެއެއްގައި އުޅެ، ކައިބޮއެ ހަދައި އުނުއަނުމަށާއި މޮބައިލް ފޯނުން ވާހަކަ ދެއްކުމަށް ހޭދަކުރާ ގޮތަކީ ގޮތް ނޭނގޭ ސިއްރެކެވެ. މިކަމުގައި ޔަޤީންވާ ކަމަކީ، ދައުވާ ކުރާފަރާތަށް އެހީތެރިވެ ފައިސާ ދެނީ ތުހުމަތު ކުރެވޭ ފަރާތުން ކަމެވެ. އެހެން ކަމުން މިއީ ލަވް ޖިހާދު މެދުވެރިކޮށް، ޤާނޫނާ ޚިލާފަށް މީހެއްގެ ދީން ބަދަލު ކުރުވުމުގެ އަމަލެކެވެ." ޙުކުމްގައި ރަވީ ކުމާރު ލިޔެފައި ވެއެވެ.
އިންޑިއާގެ އުއްތްރަ ޕްރަދޭޝްގައި ޣެއިރު ޤާނޫނީ ގޮތަށް މީހުންގެ ދީން ބަދަލު ކުރުން މަނާ ކުރާ ޤާނޫނު ފާސްކޮށްފައި ވަނީ 2020ވަނަ އަހަރުއެވެ.
ޙުކުމްކޮށް އުމުރަށް ޖަލަށް ލާފައިވާ މީހާއަކީ ބްރޭލީގެ ޢުމުރުން 26 އަހަރުގެ ފިރިހެނެކެވެ. އަންހެން މީހާއަކީ 23 އަހަރުގެ މީހެކެވެ. ކޯޓުން ވަނީ އަންހެން މީހާއާއެކު ޖިމާޢުވުމަކީ ޖިންސީ ގޯނާއެއް ކަމަށް މާނަކޮށް، ފިރިހެން މީހާ 1 ލައްކަ ރުޕީސް އިން ޖުރިމާނާވެސް ކޮށްފައެވެ.
މި މައްސަލާގައި އެތައް ކަމެއް މީޑިއާއާއި ޤާނޫނީ ފަރާތްތަކުން ފާހަގަ ކޮށްފައި ވެއެވެ. އެގޮތުން މި މައްސަލާގައި ލަވް ޖިހާދު މާނަކޮށް ފަނޑިޔާރު ޙުކުމް ކުރިކަމުގައި ވިއަސް އޭނާ ހަވާލާދިން ޤާނޫނުގެ ދަށުން މުސްލިމު ފިރިހެން މީހާ ބަންދުކުރެވިފައި ނުވާކަން ފާހަގަ ކޮށްފައި ވެއެވެ. އަދި އިންޑިއާގެ ޕާލަމެންޓްގައި ވާހަކަ ދައްކަމުން އިންޑިއާގެ ސަރުކާރުންވެސް ބުނެފައި ވަނީ ލަވް ޖިހާދު ނަމަކަށް ކިޔާ އެއްޗެއް އިންޑިއާގެ ޤާނޫނު ނުދަންނަ ކަމަށެވެ.
މީގެ ކުރިން މިފަދަ އެހެން ދެ މައްސަލައެއް އުތުރަކާންދް ސްޓޭޓްގައިވެސް ކުރިއަށް ގެންގޮސްފައި ވެއެވެ. ދެހެރާދުންއާއި ނޭނިތާލްގައި ހިންގި ޝަރީޢަތުގައި ދެމުސްލިމުންނާ ދެކޮޅަށް ހަރުކަށި ހިންދޫ ބަޖުރަންގް ދާލްއިން ފިއްތައިގެން ހުށަހެޅި ދަޢުވާ ސާބިތުވެފައެއް ނުވެއެވެ.
އުއްތުރްޕަ ޕްރަދޭޝްގެ މިމައްސަލާގެ ޙުކުމަށް ފާޑުކިޔާ ފަރާތްތަކުން ބުނެފައި ވަނީ ފަނޑިޔާރަކީ ބީޖީޕީއަށް ސަޕޯޓު ކުރާ އަދި ބީޖޭޕީން ހޮވިފައިވާ ޤާނޫނު ހަދާ މަޖިލީހުގެ މެމްބަރެއްގެ ދަރިއެއް ކަމަށެވެ. އަދި އިލާހްއާބާދުގެ ގަޔަންވާޕީ މިސްކިތުގެ ވުޟޫ ކުރާތަނުގައި ހުރި ފެންއަރުވާ ވަޑާންއަކީ ހިންދީންގެ ޝިވްލިންގް ދޭވަތާއެއް ކަމަށް ބުނެ އެތަން ކޮނެގެން ބުދުތައް ނެގުމަށް އެންގި ފަނޑިޔާރަކީވެސް މި ފަނޑިޔާރު ކަމަށެވެ.
