މެލޭޝިއާގެ ބޮޑު ވަޒީރު އަންވަރު އިބްރާހީމް ޕާކިސްތާނަށް ކުރައްވާ ރަސްމީ ދަތުރުފުޅެއްގައި އުޅުއްވާއިރު އިދިކޮޅު ޕާކިސްތާން ތަޙުރީކޭ އިންސާފް ޕާޓީ (ޕީޓީއައި) ން ބަސްއަހައިގެން މަގު މައްޗަށް ނުނިކުމެ ތިބުމަށް ހޯމް މިނިސްޓްރީން އިލްތިމާސް ކޮށްފިއެވެ.
އިސްލާމްއާބާދުގައި ބޮޑު ވަޒީރު ޝެހްބާޒް ޝަރީފާއި އަންވަރު އިބްރާހިމް ވަނީ މިއަދު ރަސްމީ މަޝްވަރާތައް ބާއްވަވާފައެވެ.
ޕީޓީއައި އިން ވަނީ ޢިމްރާން ޚާން ޖަލަށް ލާފައިވާ މައްސަލައާއި ޕާލަމެންޓަށް އައްޔަން ކުރަން ޖެހޭ މެމްބަރުން އައްޔަން ކޮށްފައި ނުވާތީ ހުކުރު ދުވަހު އިސްލާމްއާބާދުގެ ޑީ ޗޯކުގައި މުޒާހަރާ ކުރުމަށް ރާވާފައެވެ.
މި މުޒާހަރާގައި އިސްވެ ހުންނަވާނެ ކަމަށް، ޚައިބަރު ޕަޚުތޫން ޚުވާގެ ޗީފް މިނިސްޓަރ އަލީ އަމީން ޣަންދާޕޫރު ވަނީ އިއުލާން ކުރައްވާފައެވެ. އެއާއެކު އިސްލާމްއާބާދު ފުލުހުން ވަނީ ކޮންމެ ފަހަރަކު ވީއައިޕީއަކު އިސްލާމްއާބާދަށް ވަޑައިގަންނަވާއިރު މުޒާހަރާއަށް ޑީ ޗޯކަށް އެއްނުވުވުމަށް ކުރިންވެސް އަންގާފައިވާ އެންގުން ތަކުރާރުކޮށްފައެވެ.
