ޒަމާންތަކަކަށް ފަހު އީރާނުގެ އިމާން ޢަލީ ޚާމަނާއީ މިއަދު އިމާމުވެ ހުކުރު ކުރައްވައިފިއެވެ. ތެހެރާން ސްޓޭޑިއަމްގައި އޮތް ހުކުރުނަމާދުގެ ބޮޑު ޖަމާޢަތުގައި އިމާމް ޢަލީ ޚާމަނާއި ވަނީ ފާރިސީ ބަހުންނާއި ޢަރަބި ބަހުން ޚުޠުބާ ދެއްވާފައެވެ.
ޚަމަނާއީ ވިދާޅުވީ، ޒަޔަނިސްޓު ޢަދުއްވުންނަށް ދުވަހަކު ހިމޭންކަމެއްވެސް އަމާންކަމެއް ވެސް ޙާޞިލެއް ނުވާނެ ކަމަށެވެ. އަދި ޙިޒުބުﷲގެ މައްޗަށް ޒަޔަނިސްޓު ދުޝްމަނުންނަށް ނަޞްރެއްވެސް ނުހޯދޭނެ ކަމަށެވެ.
އާޔަތުﷲ ޢަލީ ޚާމަނާއީ ވިދާޅުވީ މެދުއިރުމަތީގެ ސަރަހައްދުގެ ޤައުމުތަކަކީ ސަލާމަތާއި ސުލްހަ ހޯދުމުގެ ޤާބިލްކަން ހުރި ޤައުމުތަކެއް ކަމަށެވެ. ނަމަވެސް މައްސަލައަކީ ބޭރުގެ ބާރުތަކުން ވަދެގަތުމެވެ.
އެމެރިކާއަކީ މެދުއިރުމަތީގައި ފަލަސްޠީނު މީހުންނާއި ޢަރަބިންނާއި އަދި އެހެން ސަރަހައްދުތަކުގައި ވެސް މުސްލިމުން ނެތިކޮށްލުމަށް ފައިސާއާއި ހަތިޔާރުން އެހީތެރިވެދޭ ޤައުމެވެ.
ޚާމަނާއީ ވަނީ، ޒަޔަނިސްޓުންގެ ހަމަލާތަކުން މިފަހުން ޝަހީދުކޮށްފައިވާ ހުރިހައި ޝުހަދާއިންގެ ނަންތައް ވަކިވަކިން ވިދާޅުވެފައެވެ.
200 މިސައިލުން އީރާނުން، ޒަޔަނިސްޓުންނަށް ދިން ޙަމަލާއަކީ، ޣައްޒާއަށް ތާއީދުކުރުމަށް އެޅި ފިޔަވަޅެއް ކަމަށާއި އަދި އެއީ، ގާނޫނީ އަދި ފުރިހަމަ ޝަރުއީ ފިޔަވަޅެއްކަން އޭނާ ކަށަވަރުކޮށްދެއްވިއެވެ. އަދި ޒަޔަނިސްޓުން އިތުރށް ހަރުކަށިކަން ދައްކާނަމަ އީރާނުން ފުރިހަމައަށް ޒަޔަނިސްޓުންނަށް އަދަބު ދޭނެ ކަމަށްވެސް ވިދާޅުވިއެވެ.
