ސްރީލަންކާއަށް ކުރައްވާ ރަސްމީ ދަތުރުފުޅުގައި މިއަދު އިންޑިއާގެ އެކްސްޓާނަލް އެފެއާޒް މިނިސްޓަރ އެސް ޖަޔަޝަންކަރު ކޮޅުނބަށް ވަޑައިގެންފިއެވެ. މިދަތުރުފުޅުގައި، ލަންކާ ރައީސް ކުމާރަ ޑިސަނާޔަކައާ ބައްދަލު ކުރައްވައި، ރަސްމީ މަޝްވަރާތައް ބެއްވެވިއެވެ. އަދި، ބޮޑުވަޒީރު ޑރ. ހަރީނީ އަމަރާސޫރިޔާއާ ވެސް ޖަޔަޝަންކަރު ވަނީ ބައްދަލު ކުރައްވާފައެވެ.
މީގެ އިތުރުން ކުރީގެ ރައީސް ރަނިލް ވިކްރަމަސިންހަ އާއި އެސްޖޭބީގެ ލީޑަރު ސާޖިތު ޕްރެމަދާސާއާ ވެސް އޭނާ ވަނީ ބައްދަލުކުރައްވާފަ އެވެ.
ފޮރިން މިނިސްޓަރު ހެރަތުއާއެކު ބޭއްވެވި މަޝްވަރާތަކުގައި ޖަޔަޝަންކަރު ވަނީ އިންޑިއާގެ "ނެއިބަރހުޑް ފަސްޓް" ސިޔާސަތާއި ސާގާރު ނަޒަރިއްޔާގެ މައްޗަށް ބިނާކޮށް ދެގައުމުގެ ގުޅުމާއި އެއްބާރުލުން ކުރިއަށް ގެންދިއުމަށް ވާހަކަތައް ދައްކަވާފައެވެ.
އިންޑިއާއިން ސްރީލަންކާގައި ކުރިއަށް ގެންދާ ތަރައްޤީގެ މަޝްރޫޢުތައް ދެމިއޮންނާނެ ކަމުގެ ޔަޤީންކަން ޖަޔަޝަންކަރު ދެއްވިއެވެ. އޭނާ ފާހަގަކުރެއްވި ގޮތުގައި އިންޑިއާއިން ވަނީ 61.5 މިލިއަން ޑޮލަރުގެ ހިލޭ އެހީ އާއެކު ކަންކެސަންތުރާއި ބަނދަރު ޒަމާނީ ކުރުމަށް ހުށަހަޅާފައެވެ. އަދި އިންޑިއާއިން ވަނީ 7 ލައިން އޮފް ކްރެޑިޓްގެ ޕްރޮޖެކްޓްތަކަށް 20 މިލިއަން ޑޮލަރު ވެސް ކަނޑައަޅާފައެވެ. ސްރީލަންކާއިން ބޭނުންވާ ގޮތށް އެފައިސާ ހިލޭ އެހީއަށް ބަދަލު ކުރުމުގައި އިންޑިއާގެ އިއުތިރާޒެއް ނެތްކަމަށް ޖަޔަޝަންކަރު ވިދާޅުވިއެވެ. އިންޑިއާއިން ވަނީ ސްރީލަންކާގެ ރޭލްވޭއަށް 22 ޑީސަލް އިންޖީނު ހަދިޔާ ކުރުމަށް ވެސް ނިންމާފައެވެ.
ސްރީލަންކާގެ ރައީސާއެކު އޮތް މަޝްވަރާތަކުގައި ޖަޔަޝަންކަރު ވަނީ، ހަކަތަ އުފެއްދުމާއި ކަރަންޓު ވިއުގަ ގާއިމް ކުރުމާއި ތެލާއި ގޭސް ސަޕްލައިކުރުމާއި، ބުދު ދީނުގެ މަރުކަޒުތަކުގައި ސޯލާ ކަރަންޓް ބެހެއްޓުމާއި، މުވާސަލާތީ ގުޅުމާއި ޑިޖިޓަލް ޕަބްލިކް އިންފްރާސްޓްރަކްޗަރއާއި، ސިއްހަތާއި ޑޭރީ ތަރައްޤީކުރުމުގެ ދާއިރާއިން އިންޑިއާއިން މަޝްވަރާތައް ބާއްވަވާފައެވެ.
ސްރީލަންކާގެ ދަރަނި ރިސްޓްރަކްޗަރ ކުރުމަށް އިންޑިއާއިން އެއްބާރުލުން ދޭނެ ކަމުގެ ޔަޤީންކަންވެސް ޖަޔަޝަންކަރު ވަނީ ދެއްވާފއެވެ.
ޖަޔަޝަންކަރު ވަނީ ފަސޭހަފުޅު ވަގުތެއްގައި، ސްރީލަންކާގެ ރައީސް ދިސަނާޔަކަ އިންޑިއާއަށް އިންޑިއާ ބޮޑުވަޒީރު ދަޢުވަތު ދެއްވާކަމަށްވެސް ވިދާޅުވެ ދަޢުވަތު އަރުވާފައެވެ.
