އެމެރިކާގެ ކުރީގެ ރައީސް ޑޮނަލްޑް ޓްރަމްޕަށް ކަމުދާ ގޮތަށް އުނިއިތުރުކޮށްފައިވާ އިންޖީލެއް ޗާޕްކޮށް ވިއްކައިގެން އޮގަސްޓް މަހު އެކަނިވެސް އޭނާއަށް 3 ލައްކަ ޑޮލަރުގެ ފައިދާއެއް ލިބިފައިވާ ކަމަށް އާމްދަނީ ބަޔާންތަކުން ދައްކައިފިއެވެ. ޓްރަމްޕަށް ކަމުދާ މި އިންޖީލަކީ، ގްރީންވުޑް ބައިބަލްއެވެ. ލަވަ ކިޔުމަށް މަޝްހޫރު ގްރީންވުޑް ޝާއިއުކުރާ މި އިންޖީލަކީ ޓްރަޕްމް ތާއީދުކޮށްފައިވާ އިންޖީލެއް ކަމަށް އިޢުލާންކޮށްފައި ވުމުން އޭނާގެ ސަޕޯޓަރުންގެ ގާތު މިއިންޖީލަކީ މަޤްބޫލު އިންޖީލެކެވެ. އަދި 60 ޑޮލަރަށް ވިއްކާ ކޮންމެ އިންޖީލަކުން ފައިދާއަށް ޓްރަމްޕަށް ބައި އަޅަން ޖެހެއެވެ.
އަމިއްލަ ޖަމުއިއްޔާ، އޮކްލާހޯމާ ނަންޕްރޮފިޓް އިން ތައްޔާރުކުރި ރިޕޯޓަކުން މިކަން އާންމުންގެ ސަމާލުކަމަށް އައީ، އެމެރިކާގެ އޮކްލާހޯމާ ސްޓޭޓްގެ ސްކޫލުތަކަށް އިންޖީލު ގަތުމަށް ކުރި އިޢުލާނުގެ ބިޑްގެ ތަފްޞީލުގައި ހިމަނާފައިވާ މަޢުލޫމާތުންނެވެ.
މަޢުލޫމާތު ކަރުދާހުގައި ހިމަނާފައިވާ މަޢުލޫމާތަކީ، ގްރީންވުޑް އިންޖީލަށް ފެތޭގޮތަށް ހިމަނާފައިވާ މަޢުލޫމާތެވެ. މިއިންޖީލުގައި އެމެރިކާގެ ޤާނޫނުއަސާސީ ހިމެނުމުގެ އިތުރުން އެއާ ގުޅުންހުރި ޑޮކޮއިމެންޓްތައްވެސް ހިމަނާފައި ވެއެވެ. ޗާޕްކޮށް، ހަންޖަހާފައި އޮންނަ މި އިންޖީލުގެ ބޭރުގައި ބޮޑުކޮށް ލިޔެފައި އޮންނަނީ ގޯޑް ބްލެސް އެމެރިކާ ބައިބަލް އެވެ.
އެމެރިކާއަކީ ޢިލްމާނީ ޤައުމެކެވެ. ނަމަވެސް ނަޞާރާ ދީނަށް ބާރުއެޅުމަކީ ބައެއް ފަހަރު މައްސަލައަކަށް ނުވެއެވެ.
