ޖެހިޖެހިގެން ހަތް ހަފްތާ ވަންދެން އިތުރު ވަމުން ގޮސް އިންޑިއާގެ ބޭރު ފައިސާގެ ރިޒާވް ރެކޯޑް ޢަދަދަކަށް ފުރަތަމަ ފަހަރަށް 700 ބިލިއަން ޑޮލަރު ފަހަނައަޅައި ގޮސްފިއެވެ.
ރިޒާވް ބޭންކް އޮފް އިންޑިއާ (އާރުބީއައި) އިން ހުކުރު ދުވަހު އާންމު ކުރި ތަފާސްހިސާބުތަކުން ދައްކާ ގޮތުގައި ބޭރު ފައިސާގެ ރިޒާވް ހުރީ 704.89 ބިލިއަން ޑޮލަރުގައެވެ. މިއީ ސެޕްޓެމްބަރު 27 އާ ހަމައަށް ނިމުނު ހަފްތާގައި 12.6 ބިލިއަން ޑޮލަރު އިތުރުވުމާ ގުޅިގެން ލިބުނު އިތުރު ވުމެކެވެ.
އިންޑިއާއަކީ ޗައިނާ، ޖަޕާން، އަދި ސްވިޒަލޭންޑަށް ފަހު ބޭރުފައިސާގެ ރިޒާވު، 700 ބިލިއަން ޑޮލަރަށް ފޯރި ހަތަރު ވަނަ އިގްތިސާދެވެ. އިންޑިއާގެ ބޭރުފައިސާގެ ރިޒާވް ދަނީ، 2013 ވަނަ އަހަރުން ފެށިގެން އެއްވަރަކަށް އިތުރު ވަމުންނެވެ.
އިންޑިއާގެ މަރުކަޒީ ބެންކުން ވަނީ ހަރުކަށި ފިޔަވަޅުތަކެއް އަޅައި، އިންފްލޭޝަން ކޮންޓްރޯލް ކުރުމަށް މަސައްކަތް ކޮށްފައެވެ. އަދި އިޤްތިޞާދީ ތަރައްޤީއަށް، ކަރަންޓް އެކައުންޓް ޑެފިސިޓް ހަނިވާ ގޮތަށް ފިޔަވަޅުތަކެއް ތަޢާރަފްކޮށް، ބޭރު ފައިސާގެ ރިޒާވް އިތުރުކުރުމަށް މަސައްކަތް ކޮށްފައެވެ.
އައިޑީއެފްސީ ފަސްޓް ބޭންކުގެ އިކޮނޮމިސްޓް ގައުރާ ސެން ގުޕްތާ ވިދާޅުވާ ގޮތުގައި މި ކާމިޔާބީއަކީ، އާރްބީއައިގެ ރިޒާވް ރަނގަޅު ކަމުން ބޭރު ފައިސާ ގަނެވިއްކުމުގައި ބާޒާރު ހަލަބޮލިވާ ކޮންމެ ފަހަރަކު އަގުތައް ހަމައަކަށް އެޅުވުމަށް ރިޒާވް ބޭނުން ކުރެވޭ ގޮތް ވުމެވެ. އަދި އެކަމުގެ ސަބަބުން އިންވެސްޓަރުންނަށް ލިބޭ ޔަޤީން ކަމުން ވިޔަފާރިތަކަށް ވަނުމަށް އެމީހުން ޖެހިލުމެއް ނުވެއެވެ.
މިއަހަރުގެ މިހާތަނަށް އިންޑިއާއަށް 30 ބިލިއަން ޑޮލަރުގެ ބޭރު ފައިސާގެ އާމްދަނީއެއް ލިބިފައި ވެއެވެ. އަދި ބޭރު ފައިސާގެ ރިޒާވަށް 87.6 ބިލިއަން ޑޮލަރު އިތުރުވެފައިވެއެވެ. މިއީ މިދިޔަ އަހަރާ އަޅާބަލާއިރު ގާތްގަނޑަކަށް 62 ބިލިއަން ޑޮލަރަށް ވުރެ އިތުރު އަދަދެކެވެ.
