ރޮހިންގާ ރެފިއުޖީން އަނބުރައި މިޔަންމާރުގައި ވަޒަންވެރި ކުރުމަށް މެލޭޝިއާގެ އެހީއަށް ބަނގްލަދޭޝް އިން އެދިއްޖެއެވެ. ބަނގްލަދޭޝްގެ ވަގިތީ ސަރުކާރުގެ އިސް މުޝީރު މުޙައްމަދު ޔޫނުސް ވަނީ ޑާކާއަށް ޒިޔަރަތް ކުރައްވާ މެލޭޝިއާގެ ބޮޑު އަންވަރު އިބްރާމުގެ އަރިހުން ރޮހިންގާ ވަޒަންވެރި ކުރުވުމަށް ދެކުނު އިރުމަތީ އޭޝިއާގެ ޤައުމުތަކުގެ ޖަމުޢިއްޔާގެ އެހީއަށް އެދިވަޑައިގެންފައެވެ. އަންނަ މަހު މެލޭޝިއާއިން އާސިއާންގެ ޖަމުއިއްޔާގެ ރިއާސަތާ ޙަވާލު ވާނެއެވެ.
މިއީ 11 އަހަރަށް ފަހު މެލޭޝިއާގެ ލީޑަރަކު ބަނގްލަދޭޝަށް ކުރެއްވި ފުރަތަމަ ދަތުރުފުޅެވެ.
ބަނގްލަދޭޝަކީ މިލިއަނަކަށް ވުރެން ގިނަ ރޮހިންގާ ރެފިއުޖީންނަށް ބޯހިޔާވަހިކަންދޭ ޤައުމެކެވެ.
ދެ ބޭފުޅުން ބާއްވަވާފައިވާ މަޝްވަރާތަކުގައި އަންވަރު އިބްރާހީމް ވަނީ ބަނގްލަދޭޝްގެ 18 ހާސް މީހުން މެލޭޝިއާއަށް، ވަޒީފާއަށް ގެންދަވާނެ ކަމަށް ވިދާޅުވެފައެވެ. ބަނގްލަދޭޝްގެ 8 ލައްކަ މީހުން މިހާރުވެސް މެލޭޝިއާގައި ވަޒީފާ އަދާ ކުރެއެވެ. އޭގެ އިތުރުން 3 ލައްކަ ދަރިވަރުން އެޤައުމުގައި ކިޔަވަމުން ދެއެވެ.
މެލޭޝިއާއާއި ބަނގްލަދޭޝްގެ ދެމެދު 3 ބިލިއަން ޑޮލަރުގެ ވިޔަފާރި ބަދަލު ކުރެއެވެ.
