ގޫގްލް މެދުވެރިކޮށް އިންޑިއާގެ ޑިޖިޓަލް ޕަބްލިކް އިންފްރާސްޓްރަކްޗާގެ އެޕްތައް އާންމުކޮށް ލިބޭ ގޮތް ހެދުމަށް ގޫގްލް އިން ދަނީ އިންޑިއާ ސަރުކާރާއެކު މަސައްކަތް ކުރަމުންނެވެ. "ޑިޖިޓަލް ޕަބްލިކް އިންފްރާސްޓްރަކްޗަރ (ޑީޕީއައި) އިން އަޓޫލް ބޮކްސް"ގެ ނަމުގައި މި އެޕްތައް އާންމުކޮށް ލިބޭ ގޮތަށް ގޫގްލްއިން ހަމަޖެއްސުމުން ބޭނުން ފަރާތަކަށް ކަސްޓަމައިޒްކޮށްގެން އެ އެޕްތައް ބޭނުން ކުރެވޭނެއެވެ.
ގޫގްލްއާއެކު، މިމަސައްކަތުގައި ބައިވެރިވަނީ އިންޑިއާގެ ހިލޭ ސާބަހަށް މަސައްކަތް ކުރާ ޖަމުޢިއްޔާ، "އޭކްސްޓެޕް" އިންނެވެ. މި ޖަމުއިއްޔާއަކީ އުނގަންނައި ދިނުމާ ގުޅުން ހުރި ޑިޖިޓަލް ޕްލެޓްފޯމްތަކުގައި މަސައްކަތް ކުރާ ޖަމުއިއްޔާއެކެވެ. އަދި އިންފޯސިސްގެ ބާނީ، ނަންދަން ނީލްކާނީއަކީ މި ޖަމުޢިއްޔާއަށް މާލީގޮތުން އެހީތެރިވެދޭ ފަރާތެވެ. އިންޑިއާގެ ކާކުކަން އަންގައިދޭ ކާޑް، އާދާރަކީވެސް އޭނާގެ އުފެއްދުމެވެ.
އިންޑިއާގެ ޑިޖިޓަލް ޕަބްލިކް އިންފްރާސްޓްރަކްޗާގައި ހިމެނެނީ، ކާކުކަން އަންގައިދޭ އާދާރް ސްކީމާއި، މާލީ މުއާމަލާތަށް ބޭނުންކުރާ ޔުނިފައިޑް ޕޭމެންޓް އިންޓަރފޭސްއާއި، އޯޕަން ނެޓްވޯކް ފޯރ ޑިޖިޓަލް ކޮމާސްއާއި، ޑޮކިއުމެންޓްތައް ރައްކާކުރާ ޑިޖިލޮކާފަދަ އެޕްތަކެވެ.
ޔުނިފައިޑް ޕޭމެންޓް އިންޓަރފޭސް އިމްޕްލިމެންޓް ކުރުމުން ކިއުއާރް ކޯޑެއް ފޮޓޯނަގައި، މޮބައިލް މެދުވެރިކޮށް ޕޭމެންޓް ހަދާ ލެވޭނެއެވެ.
އޯޕަން ނެޓްވޯކް ފޯރ ޑިޖިޓަލް ކޮމާސް ބޭނުން ކުރުމުން ވިޔަފާރި ކުރާ ފަރާތްތަކަށް ރައްކާތެރި މާޙައުލެއްގައި އޮންލައިންކޮށް މުދާ ގަނެ ވިއްކެއެވެ.
ޑިޖީލޮކާއަކީ، ސްކޫލާއި ކޯޓުތަކާއި ސަރުކާރު ނިސްބަތްވާ އިދާރާތަކުން މީހާއަށް ދިފައި ހުންނަ ސެޓްފިކެޓާއި ލިޔުންތައް އެއް ތަނެއްގައި ރައްކާކޮށްފައި ބެހެއްޓޭ އަދި ތަންތަނަށް ފޮޓޯ ކޮޕީ ދިނުމުގެ ބަދަލުގައި އޭގެ ސެކިއުއަރ ލިންކު މެދުވެރިކޮށް ޑޮކިއުމެންޓް ޙިއްސާ ކުރެވޭ ޕްލެޓްފޯމެކެވެ.
މިއިން ކޮންމެ އެޕަކީވެސް އިންޑިއާގައި އެތައް މިލިއަން މީހުން އެއްފަހަރާ ބޭނުން ކުރެވޭފަދަ ނިޒާމަކަށް ބައްޓަން ކޮށްފައިވާ، އަދި އެތައް އަހަރެއް ވަންދެން ބޭނުންކޮށް، އޭގެ އަޖުމަ ބަލާފައިވާ އެޕްތަކެއް ކަމުން އޭގެ ރެކޯޑް މިހާތަނަށް ރަނގަޅު ކަމަށް ދައްކާ އެޕްތަކެކެވެ.
އޭކްސްޓެޕްއިން ގޫގްލްއާ ގުޅިގެން މިތަކެތި އާންމުކޮށް ލިބޭ ގޮތް ހަދާއިރު ލިބެން ހުންނާނީ އާންމު ފައިދާއަށް ހިލޭ އެވެ. އޭކްސްޓެޕްއިން ބުނާ ގޮތުގައި މި މަސައްކަތުގެ މަޤްޞަދަކީ، އެހެން ޤައުމުތަކުންވެސް ހޭދައަކާ ނުލައި ސުމޭކް ނިޒާމާ ލާމެހިގެން ދިއުމެވެ. އިންޑިއާއިން ވަނީ ޖީ20 ގެ ބައްދަލުވުންތަކުގައިވެސް އިންޑިއާގެ ސުމޭކް އެޕްތައް ތަޢާރަފް ކޮށްފައެވެ.
