ޕާކިސްތާނަށް ކުރައްވާ ދަތުރުފުޅުގައި އިންޑިއާއާއި ޕާކިސްތާންގެ ގުޅުމުގެ ވާހަކަ ދެއްކުމެއް ނޯންނާނެ ކަމަށް އިންޑިއާގެ އެކްސްޓާނަލް އެފެއާޒް މިނިސްޓަރ އެސް ޖަޔަޝަންކަރު ވިދާޅުވެއެވެ. ނޫސްވެރިންނާ ވާހަކަ ދައްކަވަމުން ޖަޔަޝަންކަރު ވިދާޅުވީ އިސްލާމްއާބާދަށް ކުރައްވާ ދަތުރުފުޅަކީ ސަރަހައްދީ ޖަމުއިއްޔާގެ ވެރިންގެ ބައްދަލު ވުމުގައި ބައވެރިވެ ވަޑައިގަތުމަށް ކުރައްވާ ދަތުރުފުޅެއް ކަމަށެވެ.
ޕާކިސްތާނުން ވަނީ ޝެންހާއި ކޯޕަރޭޝަން އޮގަނައިޒޭޝަން (އެސްސީއޯ) ގެ ސަމިޓަށް އިންޑިއާއަށް ދައުވަތު ދީފައެވެ. އިންޑިއާގެ ބޮޑު ވަޒީރު ވަނީ އޭނާގެ ބަދަލުގައި ސަމިޓްގައި ބައިވެރިވެ ވަޑައިގަތުމަށް ޖަޔަޝަންކަރަށް އަންގަވާފައެވެ.
އިންޑިއާގައި މިދިޔަ އަހަރު އެސްސީއޯގެ ޚާރިޖީ ވަޒީރުންގެ ބައްދަލުވުން އޮތް އިރު ޕާކިސްތާންގެ އެއިރުގެ ޚާރިޖީ ވަޒީރު ބިލާވަލް ބުއްޓޫ ޒަރްދާރީ ގޯވާއަށް ވަޑައިގަތެވެ. އަދި ސަމިޓްގައި މަޖާޒީގޮތެއްގައި ވީޑިއޯ ކޮންފަރެންސަކުން ބޮޑު ވަޒީރު ޝާހްބާޒް ޝަރީފް ބައިވެރިވެ ވަޑައިގަތެވެ.
އެންމެ ފަހުން ޕާކިސްތާނަށް ވަޑައިގަތް އިންޑިއާގެ ޚާރިޖީ ވަޒީރަކީ ސުޝްމާ ސަވަރާޖުއެވެ. އެއީ 2015ގައެވެ.
ބީޖޭޕީ ވެރިކަމަށް އައިފަހުން އިންޑިއާއާއި ޕާކިސްތާންގެ ގުޅުން ވަނީ އިތުރަށް ވަޅޯވެގެން ގޮސްފައެވެ. އަދި ދެ ފަރާތުން ދަނީ އެއްބަޔަކު އަނެއްބަޔަކަށް ބައިނަލްއަޤްވާމީ ބައްދަލުވުންތަކުގައި ގަޅި އުކަމުންނެވެ.
