އިންޑިއާގައި ހުންނަ ޒަޔަނިސްޓުންގެ އެމްބަސީގެ ސްޓާފުން، އަމާޒަށް ބަޑިޖަހަން ޕްރެކްޓިސް ކުރުމަށް ދިއްލީގެ ފުލުހުންގެ ބަޑިޖަހާ މަޒުކަރު ހޯދުމަށް އެދެފިއެވެ. މީޑިއާ ރިޕޯޓްތައް ބުނާ ގޮތުން ޒަޔަނިސްޓުންގެ ފަރާތުން މި އެދުން، ދިއްލީ ފުލުހަށް ހުށަހަޅާފައި ވަނީ މިދިޔަ މަހުގެ 23ގައެވެ.
ފައިނޭންޝަލް ޓައިމްސްއިން ބުނާ ގޮތުގައި ޒަޔަނިސްޓުން އެދިފައިވާ މި ހައިރާން ކުރަނިވި އެދުމަކީ، އެހެން އެއްވެސް އެމްބަސީއަކުން ތާރީޚުގައިވެސް އެދިފައިވާ ފަދަ ކަމެއް ނޫނެވެ.
އިންޑިއާއަކީ ޒަޔަނިސްޓުންނަށް ހަޔިތާރާއި ޓެކްނޮލޮޖީއާއި މީހުން ފޯރުވައި ދީ، ޣައްޒާ ހަނގުރާމައިގައި ވާގިވެރިވާކަމަށް ފަލސްޠީނު މީހުންނާއި މުސްލިމުން ތުހުމަތު ކުރާ ޤައުމެކެވެ.
ފުލުހުންގެ ބަޑި ޖަހާ މަރުކަޒަކީ، ޕޮލިސް އެކަޑެމީން ބަލަހައްޓާ ތަނެވެ.
މީޑިއާއިން ނަން ހާމަނުކޮށް ފުލުހުންގެ އިސްފަރާތްތަކާ ހަވާލާ ދީބުނެފައި ވަނީ ޒަޔަނިސްޓުންގެ މި އެދުމަށް އާނއެކޭ ބުނުމަށް ވުރެން ނޫނެކޭ ބުނުން ގާތް ކަމަށެވެ.
ދިއްލީގައި ހުންނަ ޒަޔަނިސްޓުންގެ އެމްބަސީ ކައިރީގައި 2021 އާއި 2023ގައި ގޮއްވުންތަކެއް ގޮއްވާލާފައި ވެއެވެ. އަދި މި ގޮއްވާލުންތަކަކީ ސަމާލުކަން ހޯދަން ޒަޔަނިސްޓުން އަމިއްލައަށް ގޮއްވާލި ގޮއްވުންތަކެއް ކަމަށްވެސް ބެލެވެއެވެ.
ޑިޕްލޮމެޓިކް އާދަކާދަ ނިޔާކުރާގޮތުން އެމްބަސީ ހުންނަ ދިމާ ބޭރުގެ ސަލާމަތީ ކަންކަން ބަލަހައްޓާނީ މެހްމާންދާރީ އަދާ ކުރާ ޤައުމުންނެވެ. އެހެންވެ، މިފަދަ ހާދިސާތަކާއެކުވެސް ޒަޔަނިސްޓުންނަށް އަމިއްލައަށް ސަލާމަތީކަން ބެލެހެއްޓުމަށް އިންޑިއާއިން ދޫކޮށްލާނެ ކަމަކަށް ނުބެލެވެއެވެ.
