އިނގިރޭސި ޕްރިމިއާ ލީގުގައި ރޭގައި ފުލަމްއާ ދެކޮޅަށް ކުޅުނު މެޗު 3-2 ގެ ނަތީޖާއިން މެންޗެސްޓާ ސިޓީ ކާމިޔާބު ކޮށްފިއެވެ.
ސިޓީގެ އިއްތިހާދު ސްޓޭޑިއަމްގައި ކުޅުނު މެޗުގައި ދެ ޓީމުގެ ފަރާތުން ފެނިގެންގޮސްފައިވަނީ ވަރަށް ވާދަވެރި ކުޅުމެކެވެ. ރޭގެ މެޗުގައި އެންމެ ފުރަތަމަ ލަނޑު ޖަހާ މެޗުގެ ލީޑު ނަގާފައިވަނީ ފުލަމްއިންނެވެ. މި ލަނޑަކީ މެޗުގެ 26 ވަނަ މިނެޓުގައި އަންޑްރޭސް ޕެރޭރާ ކާމިޔާބު ކުރި ލަނޑެކެވެ.
ފުލަމްއިން ލީޑު ނެގިތާ 6 މިނެޓު ފަހުން ސިޓީގެ މިޑްފީލްޑަރު މަޓޭއޯ ކޮވަޗިޗް ވަނީ ލަނޑު ޖަހާ މެޗުގެ ނަތީޖާ ހަމަހަމަ ކޮށްފައެވެ. ކޮވަޗިޗްގެ މި ލަނޑާއެކު މެޗުގެ ފުރަތަމަ ހާފު ނިމިގެންދިޔައީ 1-1 އިން މެޗު އެއްވަރުވެގެންނެވެ.
ދެވަނަ ހާފުގައި ސިޓީއިން ވަނީ އެ ޓީމުގެ ކުޅުން ރަނގަޅު ކޮށް, ފުލަމްގެ ގޯލަށް އިތުރަށް ނުރައްކާ ކުރަން ފަށާފައެވެ. އެ ގޮތުން ދެވަނަ ހާފުގެ 47 ވަނަ މިނެޓުގައި ސިޓީއިން ވަނީ ލަނޑު ޖަހާ މެޗުގެ ނަތީޖާ އަނބުރާލާފައެވެ. މި ލަނޑު އެ ޓީމަށް ކާމިޔާބު ކޮށްދިނީ ފުރަތަމަ ލަނޑު ވެސް ކާމިޔާބު ކުރި ކޮވަޗިޗްއެވެ. މެޗުގެ 82 ވަނަ މިނެޓުގައި ޖެރެމީ ޑޮކޫ ވަނީ ލަނޑު ޖަހާ ސިޓީގެ ލީޑު ދެ ގޯލަށް އިތުރުކޮށްދީފައެވެ.
ސިޓީއިން ދެ ލަނޑުގެ ލީޑެއް ނެގުމާއެކު ފުލަމްއިން ވަނީ އެ ޓީމުގެ ހަމަލާތައް ވަރުގަދަކޮށް ލަނޑެއް ޖެހުމަށް ކުރަމުން ދިޔަ މަސައްކަތްތައް އިތުރަށް ހަރުދަނާ ކޮށްފައެވެ. އެ ގޮތުން މެޗުގެ 88 ވަނަ މިނެޓުގައި ރޮޑްރީގޯ މުނިޒް ވަނީ ލަނޑު ޖަހާ ސިޓީގެ ލީޑު އެއް ލަނޑަށް ކުޑަކޮށްފައެވެ. ނަމަވެސް މެޗުގެ ނުވަދިހަ މިނެޓު ހަމަވެގެންދިޔައިރު ވެސް އިތުރު ލަނޑެއް ކާމިޔާބު ކުރެވޭ ގޮތް ނުވުމާއެކު ފުލަމްއަށް ވަނީ އެންމެ ފަހުގެ ޗެމްޕިއަނުން ކަމުގައިވާ ސިޓީ އަތުން ބަލި ގަބޫލުކުރަން ޖެހިފައެވެ.
ރޭގެ މެޗުން ލިބުނު 3 ޕޮއިންޓާއެކު ސިޓީއިން ވަނީ އެއްވަނައިގައި އޮތް ލިވަޕޫލާ އޮތް ފަރަގު ކުޑަކޮށްފައެވެ. ކުޅުނު 7 މެޗުން ލިބުނު 17 ޕޮއިންޓާއެކު ސިޓީ ތާވަލުގެ ދެވަނައިގައި އޮތް އިރު, އެއްވަނައިގައި އޮތް ލިވަޕޫލަށް ލިބިފައިވަނީ 18 ޕޮއިންޓެވެ. މެޗުން ބަލިވި ފުލަމް އޮތީ ކުޅުނު 7 މެޗުން ލިބުނު 11 ޕޮއިންޓާއެކު ތާވަލުގެ 7 ވަނައިގައެވެ.
