އިސްލާމްއާބާދުގައި ދިރިއުޅޭ މީހުންނަށް މަގުމަތީގެ އެއް ފަރާތުގައި ކޮންޓެއިނާތައް ބަހައްޓާފައި ހުންނަތަން ފެންނަތާ ތިން މަސް ދުވަސް ވެއްޖެއެވެ. މި ފާއިތުވި ހުކުރު އަދި ހޮނިހިރު ދުވަހު މި ކޮންޓެއިނާތައް ބޭނުން ކޮށްގެން މުހިންމު ހިސާބުތަކުގެ މަގުތައް ބަންދުކޮށްފައި ވެއެވެ. އެއާއެކު، މީހުންގެ ހަރަކާތާއި މުވާސަލާތަށް ބުރޫ އަރާފައި ވެއެވެ. ސަރުކާރުން ވަނީ ބައެއް ސަރަހައްދުތަކުން މޯބައިލް ފޯނުގެ ޚިދުމަތްވެސް ކަނޑާލާފައެވެ.
ފާއިތުވި އެތައް މަހެއް ވަންދެން ވެރިރަށުގެ އެކި ހިސާބުތައް ފުރަ ބަންދަކަށް ގޮސްފައި ވެއެވެ. ނަމަވެސް ހުކުރު ދުވަހު އިސްލާމްއާބާދާއި ރާވަލްޕިންޑީ ބަންދު ކުރުމުން ކައިވެނި ހަފްލާތަކަށް ދުރާލާއި ތައްޔާރު ވެފައިވާ މީހުންނާއި އެކި އިމަޖެންސީތަކުގައި ދަތުރު ކުރަން އުޅުނު މީހުންނަށް ބޮޑެތި ތަކުލީފުތަކާ ކުރިމަތިލާން ޖެހުނެވެ.
ފޯނުގެ ޚިދުމަތް މެދުކަނޑާލުމާ ގުޅޭ ގޮތުން ޕާކިސްތާން ޓެލެކޮމިއުނިކޭޝަން އޮތޯރިޓީ (ޕީޓީއޭ) ގެ އިސް އޮފިޝަލަކު ޑޯން އަށް ވިދާޅުވީ އެފަދަ ފިޔަވަޅުތައް އަޅަނީ ސަލާމަތީ އިދާރާތަކުން ލިބޭ ރިޕޯޓުތަކާ ގުޅިގެންކަމަށެވެ.
އިސްލާމްއާބާދުގައި މިހާރު ދޭތެރޭން ފުރަބަންދު އިޙުސާސް ކުރަން ޖެހެއެވެ. ސެޕްޓެމްބަރު މަހުގެ 28 ވަނަ ދުވަހުވެސް އިމްރާން ޚާންގެ ތަޙުރީކޭ އިންސާފު ޕާޓީން އިންތިޒާމު ކުރި ހަޅުތާލަކާ ގުޅިގެން ވެރިރަށް ބަންދު ކުރަން ޖެހުނެވެ.
އަދި އާ ޓެކްސް ނެގުމުގެ ނިޒާމާ ދެކޮޅަށް އޮގަސްޓް 28 ވަނަ ދުވަހު ވެރިރަށުގެ ފިހާރަތަކައް ބަންދުކޮށްލިއެވެ.
އޮގަސްޓް 19 ވަނަ ދުވަހު އިސްލާމީ ޖަމާޢަތްތައް ކަމަށްވާ، ޖަމިއްޔަތޭ އުލޭމާ އިސްލާމް ފަޒުލުއާއި ޖަމާޢަތޭ އިސްލާމީން ވަނީ ސުޕްރީމް ކޯޓުން ނިންމި މައްސަލައަކާ ގުޅިގެން މުޒާހަރާތަކެއް ބާއްވާފައެވެ.
ޖުލައި 26 ވަނަ ދުވަހު ޖަމާޢަތޭ އިސްލާމީން ވަނީ ކަރަންޓު ބިލުތައް ބޮޑު ވުމާ ދެކޮޅަށް މުޒާހަރާ ކޮށްފައެވެ.
ޖަމާޢަތޭ އިސްލާމީގެ ހިނގާލުމުގެ ގާތްގަނޑަކަށް ދެ ހަފްތާ ކުރިން ތަޙުރީކޭ ލައްބައިކަ ޔާރަސޫލުﷲ ޕާޓީން ވަނީ މުޒާހަރާތަކެއް ބާއްވާފައެވެ. މިއީ އިޒްރޭލު ބޮޑު ވަޒީރު ޓެރަރިސްޓެއްގެ ގޮތުގައި ކަނޑައަޅައި އިޒްރޭލު މުދާ މަނާ ކުރުމަށް ގޮވާލައި ބޭއްވި މުޒާހަރާއެކެވެ.
މިހުރިހައި ހަލަބޮލިކަމާއެކު އިސްލާމްއާބާދުގެ ކަމާބެހޭ ފަރާތްތަކަށް މަސްރަހު ކޮންޓްރޯލު ކުރަން ފެންނަ ހަމައެކަނި ގޮތަކީ، މަގުތައް ބަންދު ކުރުމާއެކު، ބޭރަށް ނިކުމެ އުޅުން މަނާކޮށް ސައިކަލު ފަހަތުގައި ދަތުރުކުރުން މަނާ ކުރުމެވެ.
