އިޒްރޭލު ރައްޔިތުންގެ ގިނަބަޔަކު ޤަބޫލު ކުރަނީ 7 އޮކްޓޫބަރުގައި ފަލަސްޠީނުން އިޒްރޭލު ބަލިކޮށްލެވިފައިވާ ކަމަށެވެ. އަދި އިޒްރޭލުގެ ގިނަ ބަޔަކު ގަބޫލުކުރަނީ ހަމާސްގެ މައްޗަށް ޒަޔަނިސްޓުންނަށް ކާމިޔާބީ ހޯދޭނެ ގޮތެއް ނެތް ކަމަށެވެ.
އިސްރާއީލުގެ ޕަބްލިކް ރޭޑިއޯ "ކާން" އިން ހުކުރު ދުވަހު ކުރިއަށް ގެންދިޔަ ޚިޔާލު ހޯދުމެއްގެ ނަތީޖާއިން ދައްކާ ގޮތުގައި ޔަހޫދީންގެ 55 އިންސައްތަ މީހުން ބުނަނީ ޒަޔަނިސްޓުން ފަލަސްޠީނާ ދެކޮޅަށް ކުރާ ހަނގުރާމައިގައި ބަލިވެފައިވާ ކަމަށެވެ. އަދި ޒަޔަނިސްޓުން ކާމިޔާބުވި ކަމަށް ޤަބޫލު ކުރަނީ 27 އިންސައްތަ މީހުންނެވެ. 38 އިންސައްތަ މީހުން ބުނެފައި ވަނީ މި ސުއާލަށް ޖަވާބު ދޭން ބޭނުން ނުވާ ކަމަށެވެ.
މި ސާވޭގެ ނަތީޖާ ތަހުލީލު ކުރުމުން އެނގެނީ، ފަލަސްޠީނުގައި ޒަޔަނިސްޓުން ނާކާމިޔާބު ވެފައިވާ ކަމަށް ޤަބޫލުކުރާ މީހުންނަކީ ނަތަންޔާހޫގެ ސަރުކާރުގައި ހިމެނޭ ހައްދުފަހަނައަޅާފައިވާ ހަރުކަށި، ޓެރަރިޒަމަށް ވާގިވެރިވާ ޕާޓީތަކަށް ސަޕޯޓު ކުރާ މީހުން ކަމަށެވެ.
އެއާ ޚިލާފަށް އިދިކޮޅު ޕާޓީތަކުގެ މީހުންގެ ތެރޭން 48 އިންސައްތަ މީހުން ދެކެނީ، ފަލަސްޠީނު މީހުންނާ ކުރިމަތިލުމުގައި އިޒްރޭލު ނާކާމިޔާބު ވެފައިވާ ކަމަށެވެ.
ކާން އިން ވަނީ ޣައްޒާގެ ބޭރުން ހިފާފައިވާ، 40 ކިލޯމީޓަރުގެ ކަށިނަރު ދަމާފައިވާ ދަނޑުހައްދާ ސަރަހައްދުތަކުގައި އުޅޭ މީހުންނާ ވެސް ސުއާލުކޮށްފައެވެ. މި ސަރަހައްދަކީ 7 އޮކްޓޫބަރުގައި ޙަމާސްއިން ކަށިނަރުތައް ފޫއަޅުވާލައި ވަދެގަތް ސަރަހައްދެވެ.
ޚިޔާލު ހޯދުމުގައި ބައިވެރިވި ގިނަ މީހުން ބުނީ، މި ސަރަހައްދަކީ މިހާރު ނުރައްކާ ސަރަހައްދެއް ކަމަށާއި އެތާނގައި ދިރިއުޅެން ބޭނުން ނުވާ ކަމަށެވެ. އެތާގައި ދިރިއުޅުމަށް މައްސަލައެއް ނެތް ކަމަށް ބުނެފައި ވަނީ އެންމެ 14 އިންސައްތަ މީހުންނެވެ. 86 އިންސައްތަ މީހުން ބުނެފައި ވަނީ އެ ބިންތަކުގައި ދިރިއުޅެން ބޭނުން ނުވާކަމަށެވެ.
ކާންގެ ސާވޭގައި ބައިވެރިކޮށްފައިވަނީ، 7 އޮކްޓޫބަރުގައި ޙަމާސްއިން ދިން ޙަމަލާގައި ބިރުގަންނަވާލި މީހުންނާއި ޒަޔަނިސްޓުންގެ ހަނގުރާމައިން ދިރިއުޅުން ބަދަލު ކުރަން ޖެހުނު ޔަހޫދުންނެވެ.
މި ސާވޭއިން އެނގިފައިވާ އެހެން ކަންތައްތަކުގެ ތެރޭގައި، އިޒްރޭލުގެ 12 އިންސައްތަ މީހުން ބުނަނީ، އެމީހުން ދަންނަ މީހެއް ނޫނީ އާއިލާގެ މެމްބަރަކު ނުވަތަ ގާތް ރަހުމަތްތެރިއަކު ހަމާސްއިން ދިން ޙަމަލާގެ ސަބަބުން ނޫނީ އިޒްރޭލުން ހިންގާ ޓެރަރިސްޓް ހަނގުރާމައިގެ ސަބަބުން ގެއްލިފައިވާ ކަމަށެވެ.
އަދި 36 އިންސައްތަ މީހުން ބުނެފައި ވަނީ އިޒްރޭލުން ދެމުންދާ ޓެރަރިސްޓް ހަމަލާތައް ދިނުމުގައި ބައިވެރިވުމުން، ނޫނީ ހަމާސްގެ ހަމަލާއަކުން، މަރުވެފައިވާ އެކަކު އެމީހުންނަށް އެނގޭ ކަމަށެވެ.
މިއިން އެނގެނީ އިޒްރޭލުގެ 48 އިންސައްތަ މީހުންނަށް ހަނގުރާމައިން ސީދާ އަސަރުކޮށްފައިވާ ކަން ކަމަށް، ކާން އިން ބުނެއެވެ.
އިތުރަށް ކިޔާލުމަށް:
ހުރިހައި މިންގަނޑަކުން ބަލާއިރުވެސް ޔަހޫދުން ބަލިކޮށްލެވިއްޖެ
