ސްރީލަންކާގެ ޖަލުތަކުގައި ބަންދުކޮށްފައިވާ ސަވަންނަ ޤައިދީން އަނބުރައި ޕާކިސްތާނަށް މިއަދު ފޮނުވާލައިފިއެވެ. މި މީހުން ގެންގޮސްފައި ވަނީ ޗާޓަރުކޮށްފައިވާ ޚާއްސަ ފްލައިޓެއްގައެވެ.
މިމީހުންގެ ތެރޭގައި ހިމެނެނީ، ފަސް އަންހެނުންނާއި 51 ފިރިހެނުންނާއެކު ޖުމުލަ 56 ގައިދީންނެވެ. ޕާކިސްތާނާއި ސްރީލަންކާއިން ވަނީ ސްރީލަންކާ ޖަލު ބަންދުކޮށްފައި ތިބި ގައިދީން އަނބުރާ ގެންދިއުމަށް މަޝްވަރާތަކެއް ބާއްވާފައެވެ. މިމަޝްވަރާތައް ބާއްވާފައި ވަނީ އިސްލާމްއާބަދުގައި ހުންނަވާ ސްރީލަންކާގެ ހައިކޮމިޝަނަރާއި ޕާކިސްތާންގެ ދާޚިލީ ވަޒީރާ ދެމެދުއެވެ.
މިމީހުން ޕާކިސްތާނާށް ގެންދިއުމުގެ ހުރިހައި ޚަރަދެއް ދެއްވީ ޕާކިސްތާންގެ ޕްރައިވެޓައިޒޭޝަން މިނިސްޓަރ އަބްދުލްޢަލީމު ޚާނެވެ.
ޕާކިސްތާނުން ބޭރުގައި 23456 ގައިދީން އެޤައުމުތަކުގެ ޖަލުތަކުގައި ބަންދުކޮށްފައިވާ ކަމަށް މިއަހަރުގެ ކުރީކޮޅު ސެނެޓްގެ ހިއުމަން ރައިޓްސް ކޮމިޓީން ބުނެފައި ވެއެވެ. އަދި ސެނެޓު ކޮމިޓީން ޕާކިސްތާން ސަރުކާރަށް އަންގާފައިވަނީ، ހުރިހައި ޤައުމެއްގައި ޖަލަށްލާފައިވާ ޤައިދީންނަށް އެއްގޮތް ކޮންސިއުލާ ސިޔާސަތެއް އެކުލަވާލުމަށެވެ.
