ޗައިނާގެ ޖަލުތަކުގެ ނިޒާމުގައި ދިހަ ހާހެއްހައި ބިދޭސީން ބަންދުކޮށްފައިވާ ކަމަށް އިނގިރޭސި ނޫސްވެރިޔާ ޕީޓާ ހަމްފްރީ ބުނެއެވެ. އެޕޯކް ޓައިމްސްއިން ވަނީ އޭނާ އޮސްޓްރޭލިއާގެ ސެނެޓަށް އޭނާ ދިން މަޢުލޫމާތެއް ރިޕޯޓުކޮށްފައެވެ. ޕީޓާ ހަމްފްރީއަކީ ޗައިނާގެ ކަންކަމާ ބެހޭ ގޮތުން ރިޕޯޓު ކުރުމުގެ މަސައްކަތުގައި 50 އަހަރު ވަންދެން އުޅެފައިވާ ނޫސްވެރިއެއްކަމަށް އެޕޮކް ޓައިމްސްއިން ބުނެއެވެ. އަދި އޭނާ ވަނީ އޮޅުމަކުން ޗައިނާގެ ޖަލުގައި ދުވަސްތަކެއް ހޭދަ ކުރަން ޖެހުނު ގޮތްވެސް ކިޔައިދީފައެވެ.
އޭނާއާއި އޭނާގެ ޗައިނާ ދަރިކޮޅުގެ އެމެރިކާ އަންހެނުން ހައްޔަރުކޮށް 2013ގައި ޖަލަށްލީ ސިއްރުން ޗައިނާއަށް ޖާސޫސްކޮށް މަޢުލޫމާތު އެއްކުރުމުގެ ތުހުމަތުގައެވެ. މިދެމަފިރިން ވަނީ ޝެންހާއިގެ ޖަލެއްގައި ދެ އަހަރު ހޭދަ ކޮށްފައެވެ. ސިއްޙީ ސަބަބުތަކާ ހެދި އޭނާ ޖަލުން ދޫކޮށްލީ 2015ގައެވެ.
އެއަށްފަހު އޭނާ ވަނީ ޗައިނާގެ ޖަލުތަކުގައި ބަންދުކޮށްފައިވާ ބޭރު ޤައުމުތަކުގެ މީހުންނާ ބެހޭ މަޢުލޫމާތު އެއްކޮށްފައެވެ. ހަމްފްރީ ބުނާ ގޮތުން އޮޅިގެން މީހަކު ޖަލަށް ލެވުނަސް އެމީހެއްގެ މައްސަލަ ބަލައި އެކަމަށް ހައްލެއް ދޭނެ ނިޒާމެއް ޗައިނާއަކު ނޯވެއެވެ.
