ޕާކިސްތާންގެ ޕަންޖާބްގެ ސްކޫލުތައް ޕްރައިވެޓައިޒް ކުރުމަށް ސަރުކާރުން ނިންމާފައިވާތީ އެކަމާ ދެކޮޅަށް ބެލެނިވެރިންނާއި ޓީޗަރުންނާއި ދަރިވަރުން ވަނީ އިހުތިޖާޖު ކޮށްފައެވެ. ޕަންޖާބުގައި ޓީޗަރުން ވަނީ އެކަމާ ދެކޮޅަށް އަޑު އުފުލުމަށް މި މަހުގެ 5 ވަނަ ދުވަހު ޕްރޮވިންސްގައި ހަޅުތާލެއްވެސް ބާއްވާފައެވެ.
މައިންބަފައިންނާއި ބެލެނިވެރިން ބުނަމުން ދަނީ އަމިއލަ ފަރާތްތަކުން ހިންގުމަށް ސްކޫލުތައް ވިއްކާލުމުން ސްކޫލު ފީގެ އަގުތައް 500 ޕަސެންޓަށް އިތުރުވެގެންދާނެ ކަމަށެވެ.
ޕަންޖާބްގައި ސްކޫލުތައް ޕްރައިވެޓައިޒް ކުރުމަށް މަސައްކަތް ފަށާފައިވާތީ، ސްކޫލަށް ކުދިން ވައްދާ ނިސްބަތް ވެސް ވަނީ މަދުވެފައެވެ. ޓީޗަރުން މީޑިއާއަށް މަޢުލޫމާތު ދީފައިވާ ގޮތުގައި 70 ޕަސެންޓް ސްކޫލުތަކުގައި އެއްގޮތަކަށްވެސް އައު ކުއްޖަކު ސްކޫލަށް ވައްދާފައެއް ނުވެއެވެ. ދެން ހުރި ސްކޫލުތަކުގައިވެސް އެޑްމިޝަން ފާހަގަ ކުރެވޭ ވަރަށް ދަށްކަމަށް ބުނެއެވެ. އަދި ހަމައެއާއެކު ސްކޫލުން ކެނޑޭ ކުދިންނާއި ސްކޫލަށް ނާންނަ ކުދިންގެ އަދަދު ދަނީ އިތުރު ވަމުންނެވެ.
ޕަންޖާބް ސަރުކާރުން ވަނީ 20 ހާސް ސްކޫލު ވިއްކުމަށް ނިންމާފައެވެ. ސްކޫލުތައް ވިއްކާލުމަށް ނިންމާފައިވާ ތާރީޚަކީ، 2025ގެ މާޗް 31 އެވެ.
