އީރާނާއި އިޒްރޭލު ސަރަހައްދަށް އޮކްޓޯބަރު މަހުގެ ފަސް ވަނަ ދުވަސް، ހޮނިހިރު ދުވަހުގެ ރޭ އާދައިގެ ބާރުމިނެއްގެ ބިންހެލުމެއް އައިސްފައިވާ ކަމަށް ބުނެއެވެ. މި ބިން ހެލުމާއެކު ސުއާލު ކުރަމުން ދަނީ އެއީ އީރާނުން ކޮށްފައިވާ ނިއުކްލިއަރ ޓެސްޓެއްގެ ބިންހެލުމެއް ތޯއެވެ.
އީރާނުން ބިން ހެލުން އިޙުސާސް ކުރިތާ އިރުކޮޅެއްގެ ތެރޭގައި އިޒްރޭލުންވެސް ބިން ހެލުން އިޙުސާސް ކުރިކަމަށް ބުނެއެވެ. މި ބިންހެލުން އައިސްފައިވަނީ އީރާނުގެ ސެމްނާން ޕްރޮވިންސްގެ އަރަދާން ސިޓީއަށެވެ. ރެކްޓަރ މިންގަނޑުން 4.5 ގައި ބިންހެލުން އައިސްފައިވާ ކަމަށް ވަޒަކޮށްފައި ވެއެވެ.
އެރޭ 10:45 ހާއިރު އައި ބިންހެލުމަކީ، ބިމުގެ 10 ކިލޯމީޓަރުގެ އަޑިއަށް އައި ބިން ހެލުމެކެވެ. މި ބިންހެލުން އައި ސަރަހައްދާ 110 ކިލޯމީޓަރު ދުރުގައި އޮންނަ ތެހެރާނަށް ވެސް އެކަން އިޙުސާސް ކުރެވުނު ކަމަށް އެމެރިކާގެ ޖިއޮލޮޖިކަލް ސާވޭއިންވެސް ޔަގީން ކޮށްދެއެވެ.
އީރާނަށް ހެލުން އައިތާ ދެތިން މިނެޓް ފަހުން އިޒްރޭލުން ބިންހެލުމެއް އައިސްފައިވާ ކަމަށް ރިޕޯޓް ކުރެވުނެވެ. ޔޫރަޕިއަން މެޑިޓެރޭނިއަން ސެއިސްމިކް ސެންޓަރު (އީއެމްއެސްސީ) ވެސް ބިން ހެލުން އައި ކަމަށް ޔަގީން ކޮށްދެއެވެ. މިއީ އީރާނުގެ ނިއުކްލިއަރ މަރުކަޒާ ކައިރިއަށް އައި ބިންހެލުމެއް ކަމުން، އެކި ފަރާތްތަކުން ލަފާ ކުރަނީ މިއީ ނިއުކްލިއަރ ޓެސްޓެއް ކަމަށެވެ.
