މަރުވެފައިވާ އަލްގައިދާ ލީޑަރު އުސާމާ ބިން ލާދިންގެ ދަރިކަލުން ޢުމަރު ބިން ލާދިން ފްރާންސް ދޫކޮށް ދިއުމަށް ފްރާންސްގެ ދާޚިލީ ވަޒީރު އަންގާރަ ދުވަހު އަންގަވައިފިއެވެ.
ޢުމަރު ބިން ލާދިން އޭނާގެ ޅަފަތުގެ ފުރަތަމަ އަހަރުތައް ހޭދަކުރީ އުފަން ވަޒަން ސައުދީ އަރަބިއްޔާގައެވެ. މިހާރު ޢުމުރުން 43 އަހަރުގެ ޢުމަރު ވަނީ ސޫދާނާއި އަފްޣާނިސްތާނުގައި ވެސް ދިރިއުޅެފައެވެ.
އޭނާގެ ބައްޕަ އުސާމާ ދޫކޮށްލައި އަމިއްލައަށް އުޅެން ފެށީ އުމުރުން 19 ން ފެށިގެންނެވެ. ފަހުން 2016 ވަނަ އަހަރުން ފެށިގެން ފްރާންސްގެ އުތުރުގެ ނޯމަންޑީގައި އޭނާ ވަޒަންވެރިވެފައި ވެއެވެ. އޭނާއަކީ ކުރެހުންތެރިއެކެވެ.
ފްރާންސްގެ ކަނާތު ފިޔައިގެ ހަރުކަށި، އާ ދާޚިލީ ވަޒީރު ބްރޫނޯ ރެޓައިލޯ އެކްސްގައި ކުރެއްވި ޕޯސްޓެއްގައި ވިދާޅުވީ، ޢުމަރު ބިން ލާދިން ފްރާންސްގައި އުޅެނީ އިނގިރޭސިއެއްގެ ފިރިއެއްގެ ގޮތުގައެވެ.
ފްރާންސްގެ ދާޚިލީ ވަޒިރު ވިދާޅުވީ ޢުމަރު ބިންލާދިންއަށް އެއްގޮތަކަށް ފްރާންސަށް ވަނުން ހުއްދަ ނުވާގޮތަށް އޭނާ ޤައުމުން ބޭރުކޮށްލަނީ ކަމަށެވެ. ކޯޓުންވެސް ވަނީ އެކަމަށް ހުއްދަ ދީފައެވެ.
ވަޒީރު ވިދާޅުވަނީ ޢުމަރު ވަނީ، "2023 ވަނަ އަހަރު އޭނާގެ ސޯޝަލް ނެޓްވޯކްތަކުގައި ޓެރަރިޒަމަށް ވަކާލާތުކުރާ ކޮމެންޓްތަކެއް ޕޯސްޓްކޮށްފައި" ކަމަށެވެ. އަދި އެކަމުގެ ސަބަބުން ފްރާންސްގެ ސަރަހައްދު ދޫކޮށް ދިއުމަށް އެންގީކަމަށް ރެޓައިލޯ ވިދާޅުވި އެވެ. އަދި އޭނާގެ ނިންމުމަކީ "ޤައުމީ ސަލާމަތުގެ މަސްލަހަތަށްޓަކައި ނިންމި ޤާނޫނީ ނިންމުމެއް ކަން ކޯޓުތަކުން ވަނީ ކަށަވަރުކޮށްދީފައި،" ވަޒީރު އިތުރަށް ވިދާޅުވި އެވެ.
އުމަރު ބިންލާދިންގެ އިނގިރޭސި އަންހެނުންނަކީ އޭނާއަށް ވުރެން 20 އަހަރު ދޮށީ މާމަ ކުދިން ތިބޭ މީހެކެވެ. ޖޭން ފެލިކްސް ބްރައުން އަކީ މީގެ ކުރިން 5 ކައިވެނިކޮށްފައިވާ މީހެކެވެ. އަދި ޢުމަރު ބިން ލާދިން އޭނާއާ ކައިވެނި ކުރުމުން މީޑިއާއިން އެވާހަކަ ޝައުގުވެރިކަމާއެކު ރިޕޯޓުކޮށްފައި ވެއެވެ. ޖޭން ފެލިކްސް ބްރައުން ވަނީ ޢުމަރާ ކައިވެނި ކުރުމަށްފަހު، ޒައިނާ މުޙައްމަދުގެ ނަން އިޚުތިޔާރުކޮށްފައެވެ. މި ކައިވެންޏަށްފަހު ޢުމަރު އިނގިރޭސިވިލާތުގައި ދިރިއުޅުމަށް މަސައްކަތް ކުރުމުން އިނގިރޭސި ސަރުކާރުން އޭނާއަށް ހުރަސް އަޅާފައި ވެއެވެ.
