ކަންޓަސްގެ ފްލައިޓެއްގައި ބަރަހަނާ މަންޒަރު ހިމެނޭ ފިލްމެއް ދައްކައިފިއެވެ. އޮސްޓްރޭލިއާގެ އެއާލައިނުން ސީއެންއެންއަށް މިކަން ކަށަވަރުކޮށްދިން ބަޔާނެއްގައި ބުނެފައިވަނީ މިކަމެއް ހިނގާފައި ވަނީ މިދިޔަ ހަފްތާގައި ސިޑްނީން ޓޯކިޔޯގެ ހަނޭޑާ އެއާޕޯޓަށް ދިޔަ ފްލައިޓެއްގައެވެ. އެކުންފުނިން ބުނީ މި މައްސަލަ ދިމާވީ، އިންފްލައިޓް އެންޓަޓެއިންމަންޓް ސިސްޓަމަށް ދިމާވި ޓެކްނިކަލް މައްސަލައެއްގެ ސަބަބުން ވަކިވަކިން ފިލްމުތައް ހޮވާލެވޭ ގޮތް ނުވުމުންނެވެ.
ކުންފުނީގެ ބަޔާނުގައި ވަނީ ފްލައިޓްގައި ދައްކަން ހުރި ފިލްމުތައް މަދުކަމުން، ފަސިންޖަރުންގެ އެދުމުގެ މައްޗަށް ބިނާކޮށް މުޅި ފްލައިޓުގައި ދައްކަން އެއް ފިލްމެއް އެޅުވީ ކަމަށެވެ. މިސްމީޑިއާގައި މި ހާދިސާގެ ވާހަކަ ރިޕޯޓު ކުރި މީހުން ވަނީ ފިލްމުގެ ނަންވެސް ކިޔައި ދީފައެވެ. 2023ގެ މި ފިލްމަކީ އެމެރިކާގެ މޯޝަން ޕިކްޗަރ އެސޯސިއޭޝަނުން ބަރަހަނާ ބަންޒަރާއި ބެރެކި ކިޔުން ހިމެނޭ މަންޒަރުތައް އެކުލެވިގެންވާ ފިލްމެއް ކަމަށް ގިންތިކޮށްފައިވާ ފިލްމެކެވެ.
މިފިލްމު ހުރިހައި އިސްކިރީނެއްގައި އެއް ގަޑިއިރުވަންދެން އަޅުވާފައި އޮތުމަށްފަހު ބަޔަކު މައްސަލަ ޖެއްސުމުން ކުޑަކުދިންނަށްވެސް ބަލަން އެކަށީގެންވާ ފިލްމެއް ފަހުން އެޅުވި ކަމަށް ކުންފުނިން ބުންޏެއެވެ. ކަންޓަސް އިން ނެރުނު ބަޔާނުގައި ބުނެފައި ވަނީ ކްރޫއިން ފުރަތަމަ މަސައްކަތް ކުރީ އެ ފިލްމު ބަލަން ގަޔާނުވާ ކަސްޓަމަރުންގ އިސްކިރީނުގައި އެފިލްމު ނުދެއްކުމަށެވެ. ނަމަވެސް އެއީ ކުރެވޭނެ ކަމެއް ނޫންކަން ކަށަވަރުވުމުން އެމީހުން ކުޑަކުދިންގެ ފިލްމަކަށް ބަދަލުކުރީ ކަމަށެވެ.
އެ އެއާލައިނުން ބުނެފައި ވަނީ ދެއްކުނު މަންޒަރުތަކާ ހެދި ކެބިން ކްރޫއިން ފަސިންޖަރުންގެ ކިބައިން މައާފަށް އެދުނު ކަމަށެވެ. އަދި ޝަކުވާ ހުށަހެޅި ފަރާތްތަކުގެ ޝަކުއާއަށް ކުންފުނިން ރިޢާޔަތް ކުރާނެ ކަމަށެވެ.
"މި ފިލްމަކީ ފްލައިޓުގެ އެންމެނަށް ދައްކަން އެކަށީގެންވާ ފިލްމެއް ނޫންކަން އެނގޭ ކަމަށާއި މި ތަޖުރިބާއަށް ކަސްޓަމަރުންގެ ކިބައިން އިޚްލާސްތެރިކަމާއެކު މައާފަށް އެދެން،" ކަންޓަސްގެ ތަރުޖަމާނަކު ބުންޏެވެ.
