ޖަޕާނުގެ އާ ބޮޑުވަޒީރު ކަމަށް "މެދުމިނުގެ" ޝިގޭރޫ އިޝިބާ ހޮވުމުން ޗައިނާގެ މީޑިއާއިން ވަނީ މަރުހަބާ ކިޔާފައެވެ. އޭނާ ބޮޑު ވަޒީރުކަމަށް އައްޔަން ކުރި ގަޑިއެއްހާއިރުގެ ތެރޭގައި ޖަޕާނުން ފުރަތަމަ ފަހަރަށް އެގައުމުގެ ހަނގުރާމަ މަތީ މަނަވަރު ސަޒާނާމީ ޓައިވާން ކަނޑު އޮޅިއަށް ފޮނުވިއެވެ.
މިއީ ޓޯކިޔޯގެ އަސްކަރީ ނަޒަރިއްޔާތަށް އައިސްފައިވާ ބޮޑު ބަދަލު ހާމަވެގެންދާ ކަމެކެވެ. އެ ފިޔަވަޅާއެކު، ޖަޕާނުން ވަނީ ޗައިނާގެ އަސްކަރީ ހަރަކާތްތަކަށް ޓޯކިޔޯއިން ރައްދުދޭނީ މިފަދަ ފިޔަވަޅުތަކަކުން ކަން ސާފުކޮށްދީފައެވެ.
ޖަޕާނުން ދެކުނު ޗައިނާ ކަނޑާއި އިރުމަތީ ޗައިނާ ކަނޑުގައި ޙަރަކާތްތެރިވަމުން ދާގޮތަށް ބަލާއިރު ފެންނަނީ ޗައިނާއާއި ޖަޕާނުގެ ގުޅުން އިތުރަށް ގޯސްވާނެ ކަމަށެވެ. ޖަޕާނުން ވަނީ ޗައިނާގެ ބާރާ ކުރިމަތި ލުމަށް އައު ސްޓްރެޓެޖީތައް އެކުލަވާލަން ނިންމާފައެވެ.
ޗައިނާގައި އިޝިބާ ބެލިވިފައި ވަނީ، މެދުމިނުގެ ލީޑަރެއްގެ ގޮތުގައެވެ. އޭގެ އެންމެ މުހިންމު ސަބަބަކީ އިޝިބާއަކީ، ޑިފެންސް ޑައިލޮގް އާއި މަޝްވަރާއަށް ފޯކަސް ކުރައްވާ ލީޑަރެއްކަމުގައި ޗައިނާއަށް މާޒީގައި ފެނިގެން ގޮސްފައި ވުމެވެ. ނަމަވެސް މަޤާމާ ހަވާލު ވެވަޑައިގެން އިޝިބާ ގެންގުޅުއްވާ ސިޔާސަތަކީ، ކުރީގެ ބޮޑު ވަޒީރު ފުމިއޯ ކިޝިޑާގެ ސިޔާސަތުތައް ކަމަށް ބެލެވެއެވެ. ޖަޕާނަކީ، މިހާރު ޤައުމީ ދިފާއީ ސިޔާސަތު އިސްލާހު ކުރުމަށް މަސައްކަތް ކުރަމުންދާ ޤައުމެކެވެ.
ޗައިނާގެ ފޮރިން މިނިސްޓްރީގެ ތަރުޖަމާނު ލިން ޖިއާން އިންޒާރު ދެއްވި ގޮތުގައި ޖަޕާނުން ވަނީ ޓައިވާން ކަނޑު އޮޅިއަށް ސަޒާނާމީ ފޮނުވައިގެން "ރަތް ރޮނގެއް" ހުރަސްކޮށްފައެވެ.
ޖަޕާނުން މިފިޔަވަޅު އަޅާފައި ވަނީ ޗައިނާއިން ހިންގި ޢަމަލަކަށް ރައްދު ދިނުމުގެ ގޮތުންނެވެ. ޗައިނާއިން ވަނީ ޕެސިފިކް ކަނޑަށް ދަތުރުކުރަމުން ދިޔަ މަގުމަތީގައި ޖަޕާނުގެ ކަނޑުގެ ސަރަހައްދުތަކުގެ ތެރެއިން ޗައިނާގެ މަތިންދާބޯޓު އުފުލާ ލިއައޮނިންގް މަނަވަރާއި ދެ ޑިސްޓްރޯޔަރ ދުއްވާފައެވެ. ޗައިނާގެ މި ފިޔަވަޅާއެކު ޖަޕާނުގައި ކަންބޮޑުވުން އުފެދުނެވެ. އަދި މި ޢަމަލަށް ޖަވާބެއް ނުދީފިނަމަ، ބެއިޖިންގެ ސަރަހައްދީ ހަރުކަށިކަން ދެއްކުން އިތުރު ވެގެން ހިނގައިދާނެ ކަމަށް ބެލެވުނެވެ. ޖަޕާނުގެ ސަރަހައްދަށް ޗައިނާގެ މަނަވަރުތަކާއި އަސްކަރީ މަތިންދާބޯޓުތަކާއި ޖާސޫސީ މަތިންދާބޯޓުތައް ވަދެފައިވާ ފަހަރު ފަހަރު ޖަޕާނުން ބުނެފައި ވަނީ އެއީ، ޖަޕާނުގެ އިސްތިގުލާލާއި ގައުމީ ސަލާމަތަށް ނުރައްކާވާ ޢަމަލުތަކެއް ކަމަށެވެ.
މިހާރު ޖަޕާނުން ބުނަނީ އެގައުމުގެ މަސްލަހަތު ހިމާޔަތް ކުރުމަށް އެޅެން ހުރި ހުރިހާ ފިޔަވަޅެއް އަޅާނެ ކަމަށެވެ. ޖަޕާނުން ޓައިވާން ކަނޑު އޮޅިއަށް މަނަވަރު ފޮނުވުމަކީ، "ދަތުރުފަތުރުގެ މިނިވަންކަން" އާއި "އުސޫލުތަކުގެ މައްޗަށް ބިނާވާ ބައިނަލްއަގްވާމީ ނިޒާމަށް" ބާރުއެޅުމުގެ ގޮތުން އަޅާފައިވާ ފިޔަވަޅެއް ކަމަށް ޖަޕާނުން ބުނެއެވެ.
