އެމެރިކާގެ ރައީސް ޖޯ ބައިޑަން ވިދާޅުވަނީ އިޒްރޭލުގެ ބޮޑުވަޒީރު ބެންޔަމިން ނަތަންޔާހޫ އަކީ ނުބައި ނުލަފާ މީހެއް ކަމަށެވެ. އޭގެ އިތުރުން އޭނާ ސިފަ ކުރައްވަނީ ނަތަންޔާހޫއަކީ ހަރާމުޖާދާއެއް ކަމަށެވެ.
ބައިޑެން އެކުވެރިންނާ އެކު ބޭއްވެވި ބައްދަލުވުމެއްގައި، ނަތަންޔާހޫ ސިފަކުރެއްވީ 'ދެޓް ސަން އޮފް އަ ބި***ޗް' އޭ ވިދާޅުވެ ކަމަށް، މަޝްހޫރު ނޫސްވެރިޔާ ބޮބް ވުޑްވާޑް އަލަށް ޝާއިއު ކުރާ ފޮތް، "ވޯރ" ގައި ލިޔައެވެ.
ވުޑްވާޑްގެ ފޮތުގައި ފަރުދާގެ ފުރަގަހުގައި ބައިޑެން ނަތަންޔާހޫއާ މެދު ދެކިވަޑައިގަންނަވާ ގޮތާއި އޭނާގެ ބަސްމަގު ހާމަވެގެން ދެއެވެ.
ވުޑްވާޑް ބުނަނީ، ބައިޑަން ނަތަންޔާހޫއާ ބެހޭ ގޮތުން މި ވާހަކަ ދެއްކެވީ މިއަހަރުގެ ތެރޭގައި އިޒްރޭލުން ޣައްޒާގައި ހަނގުރާމައިގެ ޙަމަލާތައް ވަރުގަދަ ކުރަމުން ދިއުމާ ގުޅިގެންނެވެ.
ނަތަންޔާހޫގެ ނުލަފާ ކަމާ ބެހޭ ގޮތުން ބައިޑެން ވިދާޅުވި ކަމަށް ފޮތުގައި ހިމެނޭ ބައިތައް ސީއެންއެންއިން ވަނީ ގެނަސްދީފައެވެ.
އެޕްރީލް މަހު އޮތް ބައްދަލުވުމެއްގައިވެސް ބައިޑެން ވަނީ ނަތަންޔާހޫއާ ދިމާއަށް ކޯފާ އިސްކުރައްވައި "ދޮގު ނުހަދާ" އަދި "އޮޅުވާ ނުލާ" އެފަދަ އިން ހަރުއަޑުން ވިދާޅުވެފައެވެ. އަދި ރަފަހަ ބޯޑަރު ކޮންޓްރޯލުކުރުމަށް މަސައްކަތް ކުރާނެ ކަމަށް ނަތަންޔާހޫ ބުނުމުން "ކަލޭ ތީ ކޮން ގޮތަކަށް ވިސްނާ މީހެއްތޯ" ވެސް ބައިޑެން ވަނީ އައްސަވާފައެވެ.
ބައިޑެން ހުތުރު ބަސްމަގު ބޭނުން ކުރައްވާފައި ވަނީ ހަމައެކަނި ނަތަންޔާހޫއާ ބެހޭ ގޮތަކުންނެއް ނޫން ކަމަށް ވުޑްވާޑް ލިޔެއެވެ. އެމރިކާގެ ކުރީގެ ރައީސް ޓްރަމްޕާއި ރަޝިޔާގެ ރައީސް ޕޫޓިންއާ ބެހޭ ގޮތުންވެސް އަގަލު ކުޑަ ބަހުރުވަ ބޭނުން ކުރެއްވިކަމަށް ވުޑްވާޑް ލިޔެ މިސާލު ޖަހާފައި ވެއެވެ.
