ހުޅަނގުގެ ޤައުމުތަކުގެ މާލީ ނިޒާމުން ދުނިޔޭގައި ވަކި ހިއްޕައިވާތީ އެކަމުން ސަލާމަތްވާން ބްރިކްސްގެ ޤައުމުތަކުން ދަނީ އެމީހުންގެ އަމިއްލަ ޕޭމެންޓް ސިސްޓަމެއް ޤާއިމް ކުރަމުންކަމަށް ރަޝިޔާގެ މާލީ ވަޒީރު ވިދާޅުވެއެވެ.
އެމެރިކާ އިސްވެ އޮވެގެން މޮސްކޯއާ ދެކޮޅަށް އަޅާފައިވާ ދަތިކުރުމުގެ ފިޔަވަޅުގައި ހުޅަނގުން ވަނީ ޤައުމުތަކުގެ މެދުގައި މާލީ މުޢާމަލާތު ހިންގާ ސުވިފްޓްގެ ނިޒާމުން ރަޝިޔާ ބޭރުކޮށްލާފައެވެ. އެއަށްފަހު ރަޝިޔާއިން ވަނީ ހުޅަނގުގެ ނިޒާމު ނޫން ނިޒާމެއް ތަޢާރަފް ކުރުމަށް ގަދައަޅައި މަސައްކަތް ފަށާފައެވެ.
ބްރިކްސްގެ ފިނޭންސް މިނިސްޓްރީތަކާއި މަރުކަޒީ ބޭންކުތަކުން ކުރާ މަސައްކަތަށް އިޝާރާތް ކުރައްވައި ރަޝިޔާގެ މާލީ ވަޒީރު އެންތޯން ސިލުއަނޯވް ވިދާޅުވީ ބްރިކްސްގެ ނިޒާމަކީ، ސިޔާސީ ކަންކަމުން ބޭރުގައި، އެއްވެސް ޕްރެޝަރަކާއި ހުރަހެއް ނެތި އިގްތިސާދީ ކުރިއެރުން ހޯދައި، ރައްޔިތުންގެ އާމްދަނީ އިތުރުކުރުމަށް މަސައްކަތް ކުޜާނެ ނިޒާމެއް ކަމަށެވެ.
މިހާރުވެސް ރަޝިޔާއާއި ޗައިނާއާ ދެމެދު ކުރާ ވިޔަފާރި މުޢާމަލާތުގެ 95 ޕަސެންޓަކީ ދެ ޤައުމުގެ އަމިއްލަ ފައިސާ ބޭނުންކޮށްގެން ކުރެވޭ މުއާމަލާތްތަކެކެވެ.
އައު ނިޒާމުގައި ބޭނުން ކުރާނީ ޤައުމުތަކުގެ އަމިއްލަ ފައިސާއާއި ޑިޖިޓަލް ފައިސާ ކަމަށް ސިލުއަނޯވް ވިދާޅުވިއެވެ.
ރަޝިޔާއަކީ މި ދައުރުގެ ބްރިކްސްގެ ޗެއަރ އެވެ. ބްރިކްސްގައި ހިމެނެނީ، ބްރަޒިލް، އިންޑިއާ ޗައިނާ ދެކުނު އެފްރިކާ އަދި އައު މެމްބަރުން ކަމަށްވާ އީރާނާއި މިސްރާއި އިތިއޮޕިއާއާއި ޔޫއޭއީއެވެ. މިއައު މެމްބަރުން ވަދެފައި ވަނީ ޖަނަވަރީ މަހުގައެވެ.
މި މަހު ބްރިކްސްގެ ސަމިޓް އޮންނަ އިރު ޕާޓްނަރ މެމްބަރަކަށް ވުމަށްވެސް ހުޅުވާލާނެއެވެ. ނޭޓޯ މެމްބަރު ތުރުކީ ވަނީ ޕާޓްނަރު މެމްބަރަކަށް ވުމަށް ޝައުޤުވެރިވާކަމަށް ބުނެފައެވެ. ކިއުބާއިންވެސް ވަނީ ބްރިކްސްގައި ބައިވެރިވާން ޝައުޤުވެރިވާކަމަށް ބުނެފައެވެ.
