އިންޑިއަން ސަބްކޮންޓިނެންޓްގައި އިސްލާމީ ޚިލާފަތެއް ޤާއިމް ކުރުމަށް މަސައްކަތް ކުރާ ޙިޒުބުއްތަޙުރީރް ޖަމާޢަތަކީ ޓެރަރިސްޓް ޖަމާޢަތެއް ކަމަށް އިންޑިއާއިން މިއަދު ކަނޑައަޅައިފިއެވެ. އިންޑިއާގެ މިނިސްޓްރީ އޮފް ހޯމް އެފެއާޒުން މިއަދު ގެޒެޓު ކުރިގޮތުގައި، ޙިޒުބުއްތަޙުރީރާއި އެ ޖަމާޢަތާ ގުޅިފައިވާ ޖަމުޢިއްޔާ ޖަމާޢަތްތަކަކީ، ޖިހާދު ކޮށްގެން ޑިމޮކްރެޓިކް ގޮތެއްގައި އިންތިޚާބުވެފައިވާ ސަރުކާރުތަކަށް އަމާޒުކޮށްގެން ދުނިޔޭގައި އިސްލާމީ ޚިލާފަތެއް ގާއިމް ކުރުމަށް މަސައްކަތް ކުރާ ބައެއް ކަމަށެވެ. އަދި އެ ޖަމާޢަތަށް ތުހުމަތުކޮށްފައި ވަނީ ޒުވާނުންގެ މެދުގައި ހައްދުފަހަނައަޅާފައިވާ ހަރުކަށި ފިކުރު ފެތުރުމާއި ޓެރަރިސްޓް ޖަމާޢަތްތަކަށް ވާގިވެރިވާ ކަމަށެވެ.
އަދި އެ ޖަމާއަތަކީ، މީސްމީޑިއާއާއި ސެކިއުރިޓީ ކޮމިއުނިކޭޝަން އެޕްތައް މެދުވެރިކޮށާއި އިސްލާމް ދީނަށް ގޮވާލުމުގެ ނަމުގައި ބައްދަލުވުންތައް ބާއްވައި ޓެރަރިޒަމް ޕްރޮމޯޓްކޮށް އިންޑިއާގެ އެތެރޭގެ ސަލާމަތަށް ނުރައްކާ ކުރާ ޖަމާޢަތެއް ކަމަށެވެ.
ޙިޒުބުއްތަޙުރީރަކީ، މައިގަނޑު ގޮތެއްގައި ޓެމިލްނާޑޫގައި މަސައްކަތް ކުރާ ޖަމާޢަތެކެވެ.
