ފަލަސްތީނުގެ ޣައްޒާގެ ހޮސްޕިޓަލުތަކަށް ތެޔޮ ފޯރުކޮށްދޭ އުޅަނދުތަކަށް ސަހްޔޫނީ އިޒްރޭލުން ހުރަސް އަޅައިފިއެވެ.
ހޮސްޕޮޓަލްތަކަށް ބޭނުންވާ މިންވަރަށް ތެޔޮ ނުލިބުމުގެ ސަބަބުން ބައެއް ހިދުމަތްތައް އެއްކޮށް ހުއްޓިފައިވާ ކަމަށް ފަލަސްތީނުގެ ސިއްހީ އިދާރާއިން ހާމަ ކުރައްވައެވެ. އަދި ކުރިއަށް އޮތް 24 ގަޑިއިރު ތެރޭގައި ތެޔޮ ނުލިބިއްޖެނަމަ ހޮސްޕިޓަލުތަކުގެ ހިންގުން ހުއްޓުމަކަށް އަންނާނެ ކަމަށް ފަލަސްތީނުގެ ސިއްހީ އިދާރާއިން ހާމަ ކުރައްވައެެވެ.
"މިއީ ސަހްޔޫނީ ދައުލަތުގެ ހީލަތްތެރި ރޭވުމުގެ މަތިން ޣައްޒާގެ ސިއްހީ ނިޒާމް ހަލާކު ކޮށްލުމަށް ހިންގާ ޖަރީމާއެއް" ފަލަސްތީނުގެ ސިއްހީ އިދާރާއިން ނެރެފައިވާ ނޫސްބަޔާނުގައި ބުނެފައިވެއެވެ.
މިއީ ޣައްޒާގެ ހޮސްޕިޓަލުތަކަށް ތެޔޮ ފޯރުކޮށްދޭ އުޅަނދުތަކަށް އިޒްރޭލުން ހުރަސް އެޅި 5 ވަނަ ފަހަރެވެ.
މިދިޔަ އަހަރުގެ އޮކްޓޫބަރު މަހުގެ 8 ވަނަ ދުވަހުން ފެށިގެން އިޒްރޭލުން ފަލަސްތީނުގެ ރައްޔިތުންނާ ދެކޮޅަށް ހިންގަމުން އަންނަ ޤަތުލް އާންމުގައި މިހާތަނަށް 42،000 އެއްހައި މީހުން ވަނީ ޝަހީދު ކޮށްލާފައެވެ.
