އިރާނަށް ހަމަލާ ދިނުމުގައި ޢަރަބި ޤައުމުތަކުގެ ވައިގެ ސަރަހައްދު އަދި އެއްވެސް އެއަރބޭސްއެއް ބޭނުން ކުރުމަށް ފުރުސަތު ސަހްޔޫނީ އިޒްރޭލަށް ދީގެން ނުވާނެ ކަމަށް ބުނެ އިރާނުން އަރަބި ޤައުމުތަކަށް އިންޒާެރު ދީފިއެވެ.
ނަން ހާމަނުކޮށް އިރާނުގެ ސީނިއަރ އޮފިޝަލަކު "ރޮއިޓަރސް" އަށް ވިދާޅުވީ ސަޔްހޫނީ އިޒްރޭލުން އިރާނަށް ހަމަލާ ދިނުމަށް އަރަބި އެއްވެސް ގައުމެއްގެ ވައިގެ ސަރަހައްދު އަދި އެއިން ގައުމެއްގެ އެއަރބޭސް ބޭނުން ކޮށްފިނަމަ އެކަން އިރާނުން ބަލައި ނުގަންނާނެ ކަމަށެވެ.
އީރާނުގެ އޮފިޝަލަކު ވިދާޅުވީ, އިރާނަށް ޙަމަލާ ދޭން އަރަބި އެންމެ ޤައުމަކުން ޔަހޫދީންނަށް އެހީތެރިކަން ފޯރުކޮށްދިނުމަކީ, އަރަބި ހުރިހާ ޤައުމަކުން އެ ކަމުގައި ބައިވެރިވުމާ އެއްފަދަ ކަމެއްގެ ގޮތުގައި އީރާނުން ދެކޭނެ ކަމުގައެވެ. އަދި, މިފަދަ އަމަލެއް ހިންގައިފި ނަމަ, އަރަބި ހުރިހާ ޤައުމަކާ ދެކޮޅަށް ހަރުކަށި ފިޔަވަޅު އަޅަން އިރާނުން ފަސްނުޖެހޭ ކަމަށްވެސް އޮފިޝަލް ވިދާޅުވިއެވެ.
މީގެ ދެ ހަފްތާއެއްހައި ދުވަސް ކުރިން އިރާނުން ދިން ވަރުގަދަ މިސައިލު ހަމަލާގެ ބަދަލު ހިފުމަށް ސަހްޔޫނީ އިޒްރޭލުން ދަނީ ވަރަށް ބޮޑަށް ތައްޔާރު ވަމުންނެވެ. މިކަމުގައި އިޒްރޭލަށް އެންމެ ބޮޑަށް ވާގިވެރިވަމުން ދަނީ އިޒްރޭލުގެ އެންމެ ބޮޑު މަދަދުގާރު އެމެރިކާއެވެ. އެމެރިކާގެ އަސްކަރީ އެއަރބޭސްތައް އަރަބި ގިނަ ގައުމުތަކުގައި ހުންނަކަން ފާހަގަ ކޮށްލެވެއެވެ.
