ސަހްޔުނީ އިޒްރޭލު ދައުލަތް ފުޅާކުރުމަށްޓަކައި ސައުދީ އަރަބިއްޔާ އާއި މިސްރު، އިރާޤް، ސީރިޔާ، ޖޯޑަން އަދި ލެބްނަން ހިފަން ޖެހޭ ކަމަށް އިޒްރޭލުގެ ހައްދުފަހަނައެޅި ފިނޭންސް މިނިސްޓަރު ބިޒަލެލް ސްމޯޓްރިޗް ބުނެފިއެވެ.
އިޒްރޭލުގެ ޑޮކިއުމަންޓްރީއަކަށް ދިން އިންޓަވިއުއެއްގައި ސްމޯޓްރިޗް ބުނީ ޔަހޫދީން ގަބޫލް ކުރާ ފޮތްތަކުގައި ސީރިޔާގެ ދިމިޝްގާ ހަމައަށް ޔަހޫދީ ދައުލަތުގެ ބޯޑަރު ދަމާލަން ޖެހޭ ކަމަށެވެ.
"ޖޯޑަން، މިސްރު، ސީރިޔާ، އިރާޤް އަދި ސައުދީ އަރަބިއްޔާއާ ހަމައަށް ޔަހޫދީންގެ ދައުލަތް ފުޅާވާންޖެހޭނެ" ޑޮކިއުމަންޓްރީއަށް ދިން އިންޓަވިއުގައި ހައްދުފަހަނައެޅި ސްމޯޓްރިޗް ބުންޏެވެ.
އިޒްރޭލުގެ މިނިސްޓަރުންގެ ތެރެއިން ސްމޯޓްރިޗަކީ އަރަބި އިސްލާމީ ޤައުމުތައް އަޅުވެތި ކުރުމަށް އެންމެ ފާޅުކަން ބޮޑުގޮތެއްގައި ވާހަކަ ދައްކާ އިޒްރޭލުގެ ވަޒީރެވެ. ޣައްޒާއިން ފަލަސްތީނުގެ ދަރިފަސްކޮޅު ފޮހެލުމަށް ހިންގަމުން އަންނަ ޤަތުލްއާންމުގައި ހައްދުފަހަނައެޅި ބޮޑުވަޒީރު ނަތަންޔާހޫއަށް އެންމެ ބޮޑަށް ވާގިވެރިވާ ވަޒީރަކީވެސް ސްމޯޓްރިޗެވެ. މުސްލިމުންގެ މައްޗަށް އޭނާ ގެންގުޅޭ ހީލަތްތެރި، ހަރުކަށި ރޭވުންތަކުގެ ސަބަބުން އޭނާއަކީ ޒަޔަނިސްޓް ޔަހޫދީންގެ މެދުގައި މަގުބޫލް މީހެކެވެ.
އިޒްރޭލުގެ ސަހްޔޫނީ ދައުލަތް މިވަގުތު ހިންގަމުން ދަނީ ފަލަސްތީނުގެ ބިންތައް ހިފައި ބިންތައް އަޅުވެތިކޮށްގެންނެވެ. ލުބްނާނުގެ ދެކުނުގެ ބައެއް ބިންތަކާއި ސީރިޔާގެ ގޯލާންގެ އުސް ބިންތަކުގެ ކޮންޓްރޯލް މިހާރުވެސް އޮތީ އިޒްރޭލު އަތުގައިކަން ފާހަގަކޮށްލަން ޖެހެއެވެ.
