މިއަންނަ އަހަރަކީ، އިންޑިއާއާއި އާސިއާންގެ ފަތުރުވެރިކަމުގެ އަހަރުގައި ފާހަގަ ކުރުމަށް ނިންމައިފިއެވެ. ލާއޮސްގައި ކުރިއަށް ދިޔަ، އިންޑިއާ އާސިއާންގެ ސަމިޓްގައި އިންޑިއާއިން ވަނީ އަންނަ އަހަރު އާސިއަން އިންޑިއާގެ ފަތުރުވެރިކަމުގެ އަހަރު ފާހަގަ ކުރުމަށް، 5 މިލިއަން ޑޮލަރު ހޭދަކުރާނެ ކަމަށް ބުނެފައެވެ.
އިންޑިއާގެ ބޮޑުވަޒީރު ނަރެންދުރަ މޯދީ ލާއޯސްއަށް ކުރެއްވި ދަތުރުފުޅާ ގުޅޭ ގޮތުން ބޭއްވި ހާއްސަ ބްރީފިންއެއްގައި ވާހަކަފުޅު ދައްކަވަމުން އިންޑިއާގެ ޚާރިޖިއްޔާއިން ޖައިދީޕް މަޒުމްދާރު ވަނީ އެކަމާ ބެހޭ މަޢުލޫމާތު ދެއްވާފައެވެ. އެގޮތުން، 2025 ވަނަ އަހަރަކީ އާސިއާން-އިންޑިއާ ޓޫރިޒަމް އަހަރުގެ ގޮތުގައި ފާހަގަ ކުރާނެ އަހަރު ކަމަށާއި އެކަމާ އެކުއެކީގައި އެކި ދާއިރާތަކުން ދެފަރާތުގެ ގުޅުން ބަދަހި ކުރުމަށް ޚާއްސަ މަސައްކަތްތަކެއް ކުރާނެ ކަމުގައި ވިދާޅުވެފައެވެ.
މިއަހަރަކީ އިންޑިއާގެ އެކްޓް އީސްޓް ޕޮލިސީއަށް ދިހައަހަރު ފުރޭ އަހަރެވެ.
އިންޑިއާގެ ޚާރިޖިއްޔާއިން ބުނަނީ އާސިއަން ސަމިޓްގައި އިންޑިއާގެ ލުކް އީސްޓް ޕޮލިސީއާއި އިންޑިއާގެ ޑިޖިޓަލް ޕަބްލިކް އިންފްރާސްޓްރަކްޗަރއަށްވެސް ޤައުމުތަކުގެ ސަމާލުކަން ލިބިފައިވާ ކަމަށެވެ.
