މިމަހަކީ ހަނދީގެ ޢާއިލާގެ މަހެކެވެ. ނަމަވެސް މިއާއިލާގެ ގިނަމަސްމަހުގައި ހުންނަ ކުރަގަޑެއް މިމަހަކު ނުހުރެއެވެ.
މިއީ އެތެރެވަރީގައްޔާއި ބޭރު ކަނޑުތަކުގައި 30 އާއި 160 މީޓަރާ ދެމެދުގެ ފުންމިނުގައި އުޅޭ ފަތިކޮށް ހުންނަމަހެކެވެ. މިބާވަތުގެ ޅަމަސް މާކަނޑުގައި އޮޔާދާ އެތިއެތި ގަނޑުގެ ނިވަލުގައި ތިބެގެން ދަތުރުކޮށް އުޅެއެވެ. ފައްތައިގެން ކުރާ ކެޔޮޅުކަމުގައި މަދުމަދުން މިމަސްބޭނެއެވެ. މިއީ ދިވެހިން ކެއުމަށް ބޭނުންކޮށްއުޅޭ މީރުމަހެކެވެ. މަހުގެ އަނގައިގެ މަތީތަލީމަތީގައްޔާއި ތިރީތަމީގައި ފާޅުކޮށް ހުންނަ ކުދިކުދި ދަތްބަރިއެއް ހުރެއެވެ. މަހުގެ ބުރަކަށިމަތީ ކޮތަރިބައިގެ ކުރީކޮޅުގެ ކަށިތައް ފަހަތުބައިގައި ހުންނަ މަޑުކަށިތަކަށްވުރެ ކުރެވެ.
މަހުގެ ބުރަކަށިމަތީ ކޮތަރިބައިގައި 1 ހަރުކަށިހުރެއެވެ. ދެވަނަ ކޮތަރިބައިގައި 1 ހަރުކަށްޓާއެކު 27 އާއި 33 އާ ދެމެދުގެ ޢަދަދަކަށް މަޑުކަށިހުރެއެވެ. ބަނޑުދަށްފަރާތު ކޮތަރިބައިގައި ވަކިވަކިން ހުންނަ 2 ހަރުކަށްޓަށްފަހު އިތުރު 1 ހަރުކަށްޓާއެކު 18 އާއި 22 އާ ދެމެދުގެ ޢަދަދަކަށް މަޑުކަރިހުރެއެވެ. މަހުގެ ކުލައަކީ ވަރަށް މަޑު މުށިކުލައެކެވެ.
މަހުގެ ލޮލުގެ މަތީކައިރިން ފެށިގެން ބުރަކަށިމަތީގެ ކޮތަރިބައި ފެށިފައިވާ ހިސާބަށް ދާމާލެވިފައި ހުންނަ ކޫރެއްހުރެއެވެ. މިމަހަށް އަނދުންމަހޭ ކިޔަނީ މިކޫރުގެ ސަބަބުންކަމަށް ބެލެވެއެވެ. މިފާހަގަ ބޮޑަށް ހުންނަނީ ޅަމަހުގައެވެ. މަހުގެ ކަންފަތްގަޑު ހުންނަނީ ކޮތަރިބައިތަކަށްވުރެ ކަޅުކޮންނެވެ.
މަސްދަރު: ފިޝަސް އޮފް ދަ މޯލްޑިވްސް، މޯލްޑިވްސް މެރިން ރިސާޗް ސެންޓަރ، 2003
