އޮސްޓްރޭލިއާގެ ވެރިއަކާ މެދު ގޮތެއް ނިންމާނީ އޮސްޓްރޭލިއާ ރައްޔިތުން ކަމަށް ޗާލްސް ރަސްގެފާނު ވިދާޅުވެއެވެ. މި ހަފްތާގައި ރަސްގެފާނު އޮސްޓްރޭލިއާއަށް ކުރައްވާ ދަތުރުފުޅުގެ ކުރިން އޮސްޓްރޭލިއާ ޖުމްހޫރިއްޔާއަކަށް ބަދަލު ކުރަން ބޭނުންވާ މީހުން ވަނީ ބަކިންހަމް ޕެލަސަށް އެމީހުންގެ އެދުން ސިޓިއަކުން ދަންނަވާފައެވެ. މި ކަމާ ގުޅިގެން ގަނޑުވަރުން ދީފައިވާ މަޢުލޫމާތު ޑެއިލީ މެއިލް އިން ވަނީ ހާމަކޮށްފައެވެ.
އެ މަޢުލޫމާތުގައި ބުނެފައި ވަނީ "އޮސްޓްރޭލިއާ ޖުމްހޫރިއްޔާއަކަށް ވާނެތޯ" އެއީ "އޮސްޓްރޭލިއާގެ އާންމުން ނިންމަން ޖެހޭ ކަމެއް" ކަމަށް ޗާލްސް ރަސްގެފާނު ދެކެވަޑައި ގަންނަވާކަމަށެވެ.
އޮސްޓްރޭލިއާ އިނގިރޭސި ތާޖުގެ ދަށުގައި، ދުސްތޫރީ ރަސްކަމެއްގެ ގޮތުގައި ދެމިއޮތުމާއި ނުވަތަ ޖުމްހޫރިއްޔާއަކަށް ބަދަލު ކުރުމަކީ، އޮސްޓްރޭލިއާގެ ބައެއް ފަރާތްތަކުން ޒަމާނުއްސުރެން ގެންގުޅޭ ޚިޔާލެކެވެ.
ނޫހުން ބުނިގޮތުގައި ރަސްގެފާނުގެ ފަރާތްޕުޅުން ވަނީ އެސިޓީ ފޮނުވި ފަރާތްތަކަށް ޝުކުރުވެސް އަދާ ކުރައްވާފައެވެ.
