ޖަރުމަންވިލާތުގައި އައިވީ ޖަހަން ބޭނުންކުރާ ފުލުއިޑަކީ ތަދު އެއްޗެއް ކަމުގައި ވެއްޖެއެވެ. ޑުސެލްޑޮފްގެ ރެއިނިޝްޕޯސްޓްއިން ރިޕޯޓުކޮށްފައިވާ ގޮތުގައި ކުރިން ބައެއް ސަރަހައްދުގައި ތަދު އެއްޗަކަށްވި އައިވީ މިހާރު ވަނީ މުޅި ޤައުމުގައި ތަދު ބޭހަކަށް ވެފައެވެ.
ނޯރތު ރަން ވެސްޓްފާލިއާ ސަރަހައްދުގެ ސަރުކާރުން ބުނެފައި ވަނީ، ކުރިން އެ ސަރަހައްދަށް އައިވީ ފުލުއިޑް ލިބެމުން ދިޔައީ ބޭނުންވާ ވަރަށް ވުރެން 20 ޕަސެންޓް މަދުންނެވެ. ނަމަވެސް މިހާރު ލިބެނީ ކުރިން ލިބުނު މިންވަރުގެ އެންމެ 50 ޕަސެންޓެވެ.
ޖަރުމަންވިލާތުގެ ފެޑަރަލް އިންސްޓިއުޓް އޮފް ޑްރަގްސް އެންޑް މެޑިކަލް ޑިވައިސަސް އިން ބުނާ ގޮތުގައި މި ތަދުމަޑުކަން އަދި އެތައް މަސްތަކެއް ވަންދެން މި ގޮތަށް ދެމިގެން ދާނެއެވެ.
އިޒްރޭލަށް ހަތިޔާރު ވިއްކާ މުއްސަނދި ޖަރުމަންވިލާތުގައި ބޭހުގެ ތަދުމަޑުކަމަކީ އާންމުކޮށް ދިމާވާ ކަމެކެވެ. ޚާއްސަކޮށް ކުޑަކުދިންނަށް ދޭ ބޭހާއި އެންޓިބައޮޓިކް ނުލިބިގެން އުޅެންޖެހެއެވެ. ޖަރުމަންވިލާތުގެ ކުޑަކުދިންނާ ބެހޭ ޑޮކްޓަރުންގެ ޖަމުއިއްޔާ (ބީވީކޭޖޭ) ގެ 4 ބައިކުޅަ 3 ބައި ޑޮކްޓަރުން ބުނާ ގޮތުގައި ފަރުވާ ދިނުން އޮންނަކީ ބޮޑު ގޮންޖެހުމަކަށް ވެފައެވެ. އަދި ފަރުވާ ދިނުމަކީވެސް ވަގުތު ނަގާ ކަމެއް ކަމަށް އެމީހުން ބުނެއެވެ. އެއީ ބޭހެއް ލިޔެ ދިނުމުގެ ކުރިން ފުރަތަމައަށް އެބޭހެއް ލިބެން ހުރިތޯ ޑޮކްޓަރުން ޔަގީން ކުރަން ޖެހޭތީ އެކަމަށް ވަގުތު ހޭދަވާ ކަމަށެވެ.
ޖަރުމަންވިލާތުގެ ފާމަސިސްޓުންގެ އެސޯސިއޭޝަން (ޑީއޭވީ)ން ބުނާ ގޮތުގައި އާންމު ގޮތެއްގައި ދޭތެރޭން ނުލިބިގެން އުޅޭ ލިސްޓުގައި 500 ބޭހެއް ހިމެނޭ ކަމަށެވެ.
ބޭސް ނުލިބުމަކީ ޔޫރަޕްގައި ހަމައެކަނި ޖަރުމަންވިލާތަށް ދިމާވާ ކަމެއް ނޫނެވެ. ޔޫރަޕްގެ މުއްސަނދި ޤައުމުތައް ކަމަށްވާ ސުއިޑެންއާއި ޕޯޗުގަލްއާއި ސްޕެއިންއަށްވެސް ދޭތެރޭން ބޭހުގެ ތަދުމަޑުކަމެއް ދިމާވާކަމަށް 2023ގައި ފާމަސޫޓިކަލް ގްރޫޕް އޮފް ޔޫރަޕިއަން ޔޫނިއަން އިން ތައްޔާރު ކުރި ދިރާސާއެއްގައި ބުނެފައި ވެއެވެ.
މި ތަދުމަޑުކަން ދިމާވަނީ ކީއްވެގެންކަން އެނގޭ ހެއްޔެވެ؟ މި ވެރިން ބޭސްތައް އުފައްދަން ބޭނުން ކުރާ އެކްޓިވް އިންގްރިޑިއެންޓަކީ އިންޑިއާއިން ޗައިނާއިން ހޯދާ އަސާސީ މާއްދާތަކެވެ. އެތަންތަނުން އަސާސީ މާއްދާތައް ލިބުން ދަތިވެއްޖެނަމަ، ބޭސް އުފެއްދުމަށް އުރޫއަރައެވެ.
