އިތިއޮޕިއާގެ ޕާލަމެންޓުން އައު ރައީސަކު އައްޔަން ކޮށްފިއެވެ. ފޮރިން މިނިސްޓަރު ތާއި އަސްޓްކޭ ސެލާސީ އެ މަޤާމަށް އައްޔަން ކޮށްފައި ވަނީ، އިތިއޯޕިއާގެ އެންމެ ފުރަތަމަ އަންހެން ރައީސްގެ ދައުރު ހަމަވުމުންނެވެ.
އިތިއޮޕިއާގެ ފުރަތަމަ އަންހެން ރައީސް އުމުރުން 74 އަހަރުގެ ސަހްލޭ-ވޯކް ޒެވެޑޭއަކީ ޚާރިޖީ ދާއިރާގެ ތަޖުރިބާކާރެކެވެ. އެކަމަނާ މަގާމުގެ ދައުރު ހަމަވިއިރު، ބޮޑު ވަޒީރު އާބީ އަޙުމަދުއާ ދެމެދު ސިޔާސީ މައްސަލަތަކުގައި ދެބަސްވުންތައް އުފެދިފައި ވެއެވެ. އާބީ އަހުމަދު ވެރިކަމަށް ވަޑައިގަތުމަށްފަހު، 2018 ވަނަ އަހަރުން ފެށިގެން ސަހުލޭ-ވޯކް ޒެވެޑޭ ވަނީ ރައީސްގެ މަގާމު ފުރުއްވާފައެވެ.
ޚާރިޖީ ދާއިރާގައި ފާހަގަކޮށްލެވޭ މަޤާމުތަކެއް ފުރުއްވުމުގައި އެކަމަނާ ވަނީ، ޔޫރަޕާއި އެފްރިކާގައި ޑިޕްލޮމެޓިކް ގިނަ މަގާމުތަކެއް އަދާކުރައްވާފައެވެ.
އިތިއޮޕިއާގައި ސިޔާސީ ބާރު އޮންނަނީ ބޮޑު ވަޒީރުގެ އަތްޕުޅުގައެވެ.
އުމުރުން 68 އަހަރުގެ ރައީސް ތާއީ އަކީ 40 އަހަރު ވަންދެން ޚާރިޖީ ދާއިރާގައި މަސައްކަތް ކުރައްވާފައިވާ ބޭފުޅެކެވެ. ކުރިން އޭނާ ވަނީ މިސްރުގައި ހުންނަވާ އިތިއޯޕިއާގެ އެމްބެސެޑަރުގެ މަގާމު ފުރުއްވާފައެވެ. އަދި އޭނާ ފޮރިން މިނިސްޓަރުކަމަށް އައްޔަން ކޮށްފައި ވަނީ ފެބްރުއަރީ މަހުގައެވެ. އޭނާއަކީ އާބީ އަހުމަދުގެ ގާތް ބޭފުޅެއްކަމުގައި ބެލެވެއެވެ.
އިތިއޮޕިއާގައި ރައީސުން އައްޔަން ކުރަނީ، 6 އަހަރުގެ ދައުރަކަށް ޕާލަމެންޓުންނެވެ.
