ތެހެރާން (އޮކްޓޯބަރު 13): އިސްލާމިކް ރިޕަބްލިކް އޮފް އީރާނުން ޓެންޝަނާއި ހަމަނުޖެހުން އިތުރުކުރަން ބޭނުން ނުވާ ކަމަށާއި އެކަމަކު ހަނގުރާމައެއް ކުރަން ޖެހިއްޖެނަމަ އެކަން ކުރަންވެސް އިރާނުން ތައްޔާރަށް އޮތް ކަމަށް އީރާނުގެ ޚާރިޖީ ވަޒީރު އައްބާސް އަރަޣްޗީ ވިދާޅުވެއްޖެއެވެ.
އީރާނުގެ ޚާރިޖީ ވަޒީރު އަރަޣްޗީ މިހެން ވިދާޅުވީ އިރާގުގެ ފުއާދު ހުސައިންއާއެކު ބަޣްދާދުގައި މިއަދު ނޫސްވެރިންނާ ބައްދަލު ކުރައްވައި ދެއްކެވި ވާހަކަފުޅުގައެވެ.
"ކޮންމެ ހާދިސާއަކަށް ތައްޔާރަށް އޮތް ނަމަވެސް އިސްލާމިކް ރިޕަބްލިކް އޮފް އީރާނުން ޓެންޝަނާއި ހަމަނުޖެހުން އިތުރުކުރަން ބޭނުމެއް ނޫން. ހަނގުރާމައަށާއި ސުލްހައަށް ވެސް ތައްޔާރަށް މިތިބީ،" އިރާނުގެ ޚާރިޖީ ވަޒީރު އަރަޣްޗީ ވިދާޅުވިއެވެ.
"މި ސަރަހައްދު އޮތީ ބިރުވެރިކަމުގެ ހާލަތެއްގައި، އަދި ހަމަނުޖެހުންތައް ފެށުމުގެ ފުރުސަތު ވަރަށް ބޮޑު، އެއީ ޒަޔަނިސްޓް ވެރިކަމުގެ ޖަރީމާތަކުގެ ސަަބަބުން،" ސަރަހައްދުގެ އެހެން ގައުމުތަކަށް ހަނގުރާމަ ފެތުރިދާނެ ކަމުގެ އިންޒާރު ދެއްވަމުން އަރަޣްޗީ ވިދާޅުވިއެވެ.
އަރަޣްޗީ ވިދާޅުވީ ޣައްޒާ އާއި ލުބުނާނުގެ ރައްޔިތުންގެ ހައްގުގައި އިޒްރޭލާ ކުރިމަތިލައި ހަނގުރާމަ ހުއްޓުވުމަކީ ސަރަހައްދީ ގައުމުތަކަށް ލާޒިމު ކަމެއް ކަމަށެވެ.
"އިރާގުގެ ފަރާތުން ރަނގަޅު މަޝްވަރާތަކެއް ކުރެވުނު، އިރާނާ ދެކޮޅަށް، އަދި އެހެން ގައުމަކާ ދެކޮޅަށްވެސް ހަމަލާއެއް ދިނުމަށް އިރާގުގެ ވައިގެ ސަރަހައްދު ބޭނުން ކުރަން ހުއްދަ ނުދޭނެ ކަމުގެ ޔަގީންކަން އިރާގުގެ އޮފިޝަލުން ދެއްވައިފި. މިކަމަށްޓަކައި އިރާގުގެ ކަމާބެހޭ ފަރާތްތަކަށް އަޅުގަނޑު ޝުކުރު އަދާކުރަން،" އަރަޣްޗީ ވިދާޅުވި އެވެ.
އަރަޣްޗީ ވިދާޅުވީ އިޒްރޭލުގެ ހަމަލާތަކުގެ ސަބަބުން ހާލުގައި ޖެހިފައި ތިބި ލުބްނާނުގެ ރައްޔިތުންނަށް އިރާނުން ފޮނުވުމަށް މަސައްކަތް ކުރާ އެހީތަކަށް ޒަޔަނިސްޓް އިޒްރޭލުން ހުރަސްއަޅަމުންދާ ކަމަށެވެ. "އެކަމަކުވެސް އަޅުގަނޑުމެންގެ އެހީ ލުބްނާނުގެ ރައްޔިތުންނަށް ލިބޭނެ" އަރަޣްޗީ ވިދާޅުވިއެވެ.
