ތުތި ބޯވަދިލަމަސް އުޅަނދަށް ނެގުމަށްފަހު ލަސްނުކޮށް އޭގެ ގޮހޮރު ދަމައި، ސާފުކޮށް، ޕޮލިތީން ކޮތަޅަށް ލުމަށްފަހު ފިނިކުރަންޖެހެއެވެ. ފިނިކުރާނީ ކޮންމެ 1 ކިލޯ މަހަކަށް 1 ކިލޯ އައިސް އަޅައިގެންނެވެ. ތުތި ބޯވަދިލަމަސް އުޅަނދުގައި ފިނިކޮށްފައި ބެހެއްޓުމަށް އެންމެ އެކަށީގެންވާ މުއްދަތަކީ 5 ދުވަހެވެ.
ތުތި ބޯވަދިލަމަސް ޕްރޮސެސްކުރުމަށްފަހު، ރައްކައުކޮށް ބަހައްޓަންޖެހެނީ 5- (މައިނަސް 5) ޑިގްރީ ސެލްސިއަސް ގައެވެ. ތުތި ބޯވަދިލަމަހަކީ ޖަޕާނުގައި ސުޝީ އާއި ސަޝިމީ ތައްޔާރު ކުރުމަށް ވަރަށް މަޤުބޫލު ބާވަތެކެވެ. ބޭރުގެ ބާޒާރުގައި އާންމުކޮށް ތުތި ބޯވަދިލަމަހުގެ އަގު އުޅެނީ ގާތްގަނޑަކަށް ކިލޯއަކަށް 8 (އަށެއް) އެމެރިކާ ޑޮލަރާއި 10 (ދިހައެއް) އެމެރިކާ ޑޮލަރާ ދެމެދުގެ އަގުތަކެއްގައެވެ.
ޖަޕާނު މާކެޓުގައި ތުތި ބޯވަދިލަމަހުގެ ކިލޯއަކަށް 20 (ވިހި) އެމެރިކާ ޑޮލަރާއި 30 (ތިރީސް) އެމެރިކާ ޑޮލަރާ ދެމެދުގެ އަގެއް ލިބެއެވެ. އެހެންނަމަވެސް، މިއަދާ ހަމައަށް ދިވެހިރާއްޖެއިން ތުތި ބޯވަދިލަމަސް އެކްސްޕޯޓުކޮށްފައެއް ނުވެއެވެ. އަދި ތުތި ބޯވަދިލަމަސް ވިއްކަމުންދަނީ ހަމައެކަނި ރާއްޖޭގެ ބާޒާރުތަކަށާއި ރެސްޓޯރަންޓުތަކަށެވެ. ދިވެހިރާއްޖޭގައި މިވަގުތު ތުތި ބޯވަދިލަމަސް ގަނެ ޕްރޮސެސްކުރުމުގައި ހަރަކާތްތެރިވަނީ އެންމެ ފަރާތެކެވެ.
ނޯޓް: https://sarukaaru.gov.mv/articles/4889
