އެމެރިކާއިން ކަނޑައަޅާ ރަތް ރޮނުތަކެއް އީރާނުން ނުދަންނަ ކަމަށާއި މެދުއިރުމަތީގައި ތިބޭ އެމެރިކާ ސިފައިން ނުރައްކަލަކަށް ވައްޓާނުލުމަށް އީރާންގެ ޚާރިޖީ ވަޒީރު އެމރިކާއަށް އިންޒާރު ކުރައްވައިފިއެވެ.
އީރާނުގެ ފޮރިން މިނިސްޓަރު އައްބާސް އަރާކްޗީ ވަނީ ރައީސް މަހްމޫދު ޕަޒަކްޝިއާގެ ސިޓީފުޅަކާއެކު ބަޣުދާދަށް ދަތުރުކުރައްވާފައެވެ. އަދި އޭނާ ޤާހިރާއަށްވެސް ސިޓީފުޅެއް ގެންދަވާނެ ކަމަށް ރިޕޯޓުކޮށްފައި ވެއެވެ.
އަރާކްޗީގެ މި ދަތުރުފުޅަކީ، ޒަޔނިސްޓުން އީރާނުގެ ތެޔޮ އުފައްދާ މަރުކަޒުތަކަށް ހަމަލަތައް ދޭނެ ކަމަށް ބުނެ އިންޒާރު ދިނުމާ ގުޅިގެން ކުރައްވާ ދަތުރުފުޅެކެވެ. އީރާންގެ ފޮރިން މިނިސްޓްރީގެ ތަރުޖަމާނު އިސްމާއީލް ބަޣާއީ ވިދާޅުވީ އާރާގްޗީ ގެ ދަތުރުފުޅަކީ، "މި ސަރަހައްދުގެ ގައުމުތަކާއެކު ޑިޕްލޮމެޓިކް މަޝްވަރާތަކުގެ ތެރޭން ކުރިއަށް ގެންދަވާ ކަމެއް" ކަމަށެވެ.
އަރާގްޗީ ޤާހިރާގައި މިސްރުގެ ރައީސް އަބްދުލް ފައްތާޙް އެލްސީސީ އާއި ޖާސޫސީ ޚިދުމަތުގެ ވެރިޔާ އައްބާސް ކަމާލް އާއި އޭނާގެ ޚާރިޖީ ވަޒީރު ބަދުރު އަބްދުލްޢަތީއާވެސް ބައްދަލުކުރައްވާނެއެވެ.
އީރާނުންވަނީ، އިޒްރޭލުން ދޭ ހަމަލައަކަށް އަރަބިން ވާގިވެރި ނުވުމަށް ނުސީދާކޮށް އިންޒާރުކޮށްފައެވެ. އަދި ޔޫރަޕްގެ ފަރާތްތައް މެދުވެރިކޮށް އެމެރިކާއަށް ވެސް އީރާނުން ވަނީ އިންޒާރު ދީފައެވެ.
އީރާނުން ބުނާ ގޮތުގައި "ތެޔޮ ހޮޅިއަށް ނުވަތަ އެގައުމުގެ ނިއުކްލިއާ ހަކަތަ އުފައްދާ ވަސީލަތްތަކަށް އަމާޒުކޮށްގެން އިޒްރޭލުން ހަމަލާއެއް ދީފިނަމަ ރަތް ރޮނގުތައް ހުރަސް ކުރީކަމަށް ބަލާނެ ކަމަށާއި އެފަދަ ހާލަތެއްގައި ރައްދު ދިނުން ނޫން ގޮތެއް އީރާނަށް ނޯންނާނެ" ކަމަށެވެ.
