އީރާނުގެ ބެލެސްޓިކު ހަމަލަތަކުން ދިފާޢުވުމަށް، ފަލަސްޠީނުގައި އިންދާފައިވާ ޒަޔަނިސްޓުންގެ ދައުލަތަށް، އެމެރިކާއިން ތާޑް އެއާ ޑިފެންސް ސިސްޓަމްގެ ބެޓެރީއެއް ފޮނުވާނެ ކަމަށް ބައިޑެންގެ ސަރުކާރުން އިޢުލާން ކޮށްފިއެވެ.
އެމެރިކާގެ ދިފާޢީ ވުޒާރާގެ ތަރުޖަމާނު ޕެޓް ރައިޑާ ނެރުނު ބަޔާނެއްގައި ވިދާޅުވީ އެމެރިކާގެ ރައީސް ޖޯ ބައިޑަންގެ އިރުޝާދާ އެއްގޮތަށް، ޑިފެންސް ސެކްރެޓަރީ ލޮއިޑް އޮސްޓިން ވަނީ އިސްރާއީލުގައި ތާޑް މިސައިލް ބެޓެރީއަކާއި އެމެރިކާގެ ސިފައިންގެ ފައުޖެއް ބޭއްވުމަށް ހުއްދަ ދެއްވާފައެވެ.
ބައިޑަން ވަނީ ފްލޮރިޑާއަށް ވަޑައިގަތުމުގެ ކުރިން ނޫސްވެރިންނަށް ދެއްވި އިންޓަވިއުއެއްގައި އެ ނިޒާމު "އިސްރާއީލް ދިފާއު ކުރުމަށް" ޑިޕްލޮއި ކުރަން އެއްބަސްވެވަޑައިގެންފައިވާ ކަމަށްވެސް ވިދާޅުވެފައެވެ.
އެމެރިކާގެ ދިފާއީ ވުޒާރާއިން ބުނީ، މިއީ "އީރާނުން އިޒްރޭލު ދިފާއުކުރުމަށް، އަދި އިސްރާއީލުގައި ތިބި އެމެރިކާ މީހުން ދިފާއުކުރުމަށް އެމެރިކާއިން ކޮށްފައިވާ ވައުދާ އެއްގޮތަށް ކުރާ ކަމެއް" ކަމަށެވެ.
ތާޑް ޑިފެންސް ބެޓެރީ ފޮނުވާނީ ކޮންތާކުން ކަމެއް އަދި އިޒްރޭލަށް ފޯރާނީ ކޮން އިރަކު ކަމެއް ސާފެއް ނުވެ އެވެ. އިޒްރޭލު ސިފައިންގެ ބައިނަލްއަގްވާމީ ތަރުޖަމާނު ބުނެފައި ވަނީ އެކަމަށް ތާވަލެއް ނެތް ކަމަށާއި ނަމަވެސް އެމެރިކާއިން ތާއީދާއި އެއްބާރުލުމަށް އޭނާ ވަނީ ޝުކުރު އަދާކޮށްފަ އެވެ.
