ޗައިނާގައި އުފައްދާ ލައިޓަރާއި ލަޓަރު އުފައްދަން ބޭނުންކުރާ ބާވަތްތައް މިއަދުން ފެށިގެން އެތެރެ ކުރުން މަނާކަމަށް އިންޑިއާއިން ކަނޑައަޅައިފިއެވެ. އިންޑިއާގެ ކޮމާސް މިނިސްޓްރީން މިއަދު ނެރުނު އާންމު ސިޓިއެއްގައި އިތުރަށް ބުނެފައި ވަނީ 20 ރުޕީސްއަށް ވުރެން އަގު ހެޔޮ ލައިޓަރާއި ބިއުރޯ އޮފް އިންޑިއަން ސްޓޭންޑަރޑަށް ނުފެތޭ ލައިޓަރުތައް މިއަދުން ފެށިގެން އެތެރެ ކުރުން މަނާ ކަމަށެވެ.
ޗައިނާއިން އިމްޕޯޓު ކޮށްފައިވާ ލައިޓަރެއް، އިންޑިއާގައި 10 ރުޕީސްއަށް ވިއްކައެވެ. ކޮންމެ އަހަރަކުވެސް ޗައިނާއިން ލައިޓަރާއި ލައިޓަރުގެ ބައިތައް އެތެރެ ކުރުމަށް އިންޑިއާއިން 5 މިލިއަން ޑޮލަރު ހޭދަ ކުރެއެވެ.
ޗައިނާގައި އުފައްދާ ލައިޓަރުގެ ސަބަބުން އިންޑިއާގެ ޓެމިލްނާޑޫގެ ގިނަ މީހުންގެ ވަޒީފާ ގެއްލޭކަމަށް ވިދާޅުވެ ޓެމިލްނާޑޫ ޗީފް މިނިސްޓަރވެސް ޝަކުވާ ކުރައްވާފައި ވެއެވެ. ޓެމިލްނާޑޫއަކީ އަލިފާން ފޮށި އުފެއްދުމުން ބޮޑު އާމްދަނީއެއް ހޯދާ ސްޓޭޓެކެވެ.
ޗައިނާއަކީ އެމެރިކާއަށް ފަހު އިންޑިއާގެ ދެވަނައަށް އެންމެ ބޮޑު ވިޔަފާރި ބައިވެރިޔާއެވެ. އިންޑިއާއިން ޗައިނާއިން 101 ބިލިއަން ޑޮލަރުގެ މުދާ އެތެރެ ކުރެއެވެ.
