ޗައިނާ ފަތުރުވެރިންނަށް ޔަގީން ދަތުރެއް ކަށަވަރު ކޮށްދޭ އެޕަކީ، މިހާރު ޗައިނާގެ އިންސްޓަގްރާމެވެ. ޗައިނާގެ އިންސްޓަގްރާމް: ޝިއާއޮހޮންގްޝޫ އަކީ ތަފާތު އެޕެކެވެ! ދަތުރުތަކާ ބެހޭ ގޮތުން މީހުންގެ ތަޖުރިބާތައް ތަފްސީލު ކޮށް ކިޔައިދެވޭ ގޮތަށް އެ އެޕް ޑިޒައިންކޮށްފައި ވެއެވެ.
ޝިއާއޮހޮންގްޝޫގެ، ޓްރެވަލް ޕޯސްޓްތަކުގައި ހޮޓަލާއި ރެސްޓޯރެންޓްތަކުގެ ތަފްސީލީ ރިވިއުތަކާއި، ދަތުރުފަތުރުގެ ލޮޖިސްޓިކްސްގެ މަޢުލޫމާތާއި ސަމާލުވާން ޖެހޭ ކަންކަމާއި ފިހާރަތަކާއި ޝައުޤުވެރި ފޮޓޯތައް ނަގާނެ ތަންތަނުގެ ލިސްޓްތައް ހިމެނެއެވެ. އެހެންވެ، ޗައިނާ މީހާއަށް ކޮންމެ ދަތުރަކީވެސް ފުރިހަމަ ތަޖުރިބާއަކަށް ވެގެން ދެއެވެ.
ޗައިނާގެ އިންސްޓަގްރާމްގައި މަހަކު 300 މިލިއަނަށް ވުރެ ގިނަ އެކްޓިވް ޔޫޒަރުން ހަރަކާތްތެރި ވެއެވެ. ޗައިނާގެ ޒުވާން ދަތުރުވެރިންގެ މެދުގައި މަޤްބޫލު ވުމުން، މި އެޕް ވެފައި ވަނީ، އެންމެ މަޤްބޫލު ޓްރަވެލް ގައިޑަށެވެ.
ޝިއާއޮހޮންގްޝޫގެ ސަބަބުން ދެކުނު އިރުމަތީ އޭޝިއާގެ ޤައުމުތަކަށް ދަތުރުކުއާ އަދަދު އިތުރު ވެފައި ވެއެވެ. 2019 ވަނަ އަހަރު ދެކުނު އިރުމަތީ އޭޝިއާގެ ގައުމުތަކަށް ޗައިނާގެ 32 މިލިއަނަށް ވުރެ ގިނަ ފަތުރުވެރިން ޒިޔާރަތްކޮށްފައިވެއެވެ. އަދި މި ޤައުމުތަކަށް އެންމެ ގިނައިން ފަތުރުވެރިން އަންނަނީވެސް ޗައިނާއިންނެވެ.
ދެކުނު އިރުމަތީ އޭޝިއާގައި މީހުން އެންމެ މަދުން ޒިޔާރަތްކުރާ އެއް ގައުމަކީ، ލާއޯސް އެވެ. ނަމަވެސް ޝިއާއޮހޮންގްޝޫގެ ސަބަބުން ލާއޯސް ވަނީ ކެމްބޯޑިއާއަށް ވުރެން މަޤްބޫލު މަންޒިލަކަށް ވެފައެވެ. ލާއޮސްގައި ޗައިނާ ފަތުރުވެރިންގެ ތަޖުރިބާތައް، ޝިއާއޮހޮންގްޝޫގައި ހިއްސާކޮށް، 71،000 އަށް ވުރެ ގިނަ ޕޯސްޓުތައް ލިޔެފައިވެ އެވެ. ޗައިނާއިން ބުލެޓް ޓްރޭންގައި ދަތުރު ކުރެވޭ މިޤައުމަށް ޗައިނާގެ އިންސްޓަގްރާމްގައި ލިބިފައިވާ މަޤބޫލުކަމާ އަޅާބަލާއިރު ކެމްބޯޑިއާގެ ތަޖުރިބާއާ ބެހޭ ގޮތުން މީހުން ލިޔެފައިވަނީ އެންމެ 37،000 ޕޯސްޓެވެ. ތަފާތަކީ، ލާއޯސްއަކީ ޚަރަދު ކުޑަ ފަސޭހަ މަންޒިލެއްކަމަށް މީހުން ލޭބަލް ކުރުމެވެ. "މިއީ އަސްލެއްތަ؟ ޤައުމުން ބޭރުގައި އެއް ހަފްތާގެ މަޖާކޮށްލުމަށް އެންމެ ދެ ހާސް ޔުއޭން؟ 290 ޑޮލަރު؟" ޝިއާއޮހޮންގްޝޫގައި މީހަކު ޕޯސްޓު ކުރިއެވެ.
