ލުބްނާނުގައި މިވަގުތު ތިބި އެމެރިކާގެ ހުރިހާ ރައްޔިތުން "ވަގުތުން" ލުބްނާނު ދޫކޮށް ދިޔުމަށް ލުބްނާނުގައި ހުންނަ އެމެރިކާގެ އެމްބަސީއިން އަންގައިފިއެވެ.
ލުބްނާނުގައި ތިބި އެމެރިކާ ރައްޔިތުން ބޭލުމަށް އެގައުމުން މިހާރު ވަނީ ހާއްސަ ފްލައިޓްތަކެއްވެސް ހަމަޖައްސާފައިކަމަށް އަލްޖަޒީރާއިން ބުނެއެވެ.
ލުބްނާނު ދޫކޮށް "ވަގުތުން" ދިޔުމަށް އެމެރިކާ ރައްޔިޔުންނަށް އެމްބަސީއިން އަންގާފައި މިވަނީ ސަޔްހޫނީ އިޒްރޭލުން ލުބްނާނުގެ ވެރިރަށް ބެއިރޫތަށް ވަރުގަދަ ވައިގެ ހަމަލާތަކެއް ދޭން ފެށިތާ މާގިނައިރުތަކެއް ނުވަނީހެނެވެ.
މީގެ އިތުރުން ލުބްނާނުގެ ދެކުނުން އެއްގަމު މަގުން އަރައިގަތުމަށް އިޒްރޭލުގެ ސަޔްހޫނީ ފައުޖުތައް މަސައްކަތް ފަށާފައިވާއިރު، މީގެ ސަބަބުން މި ސަރަހައްދުގައި ވަރުގަދަ ހަނގުރާމައެއް ފެށިދާނެ ކަމުގެ ބިރު ވަނީ ވަރަށް ބޮޑުވެފައެވެ.
މުހައްލިލުން ވިދާޅުވާ ގޮތުގައި ލުބްނާނުގައި ތިބި އެމެރިކާ ރައްޔިތުން އެގައުމު ދޫކޮށް ދިޔުމަށް އެމެރިކާއިން ބޭނުން ކުރި ބަސްމަގަށް ބަލާއިރު އެއްގަަމާއި ވައިގެ މަގުން ސަހްޔޫނީ އިޒްރޭލުން ލާއިންސާނީ ވަރުގަދަ އުދުވާންތަކެއް ކުރިއަށް އޮތް މަދު ދުވަސްތަކުގެ ތެރޭގައި ލުބްނާނާ ދެކޮޅަށް ފަށާނެެއެވެ.
