ޝަންހާއީ ކޯޕަރޭޝަން އޯގަނައިޒޭޝަން (އެސްސީއޯ)ގެ މެމްބަރު ގައުމުތަކުގެ ކައުންސިލް އޮފް ދަ ހެޑްސް އޮފް ގަވަރމަންޓްގެ 23 ވަނަ ބައްދަލުވުން އިސްލާމްއާބާދުގައި މިއަދު ފަށައިފި އެވެ. އެސްސީއޯގެ މެމްބަރު ގައުމުތަކުގެ ސަރަހައްދީ ލީޑަރުން ބައިވެރިވާ ދެ ދުވަހުގެ މުއްދަތަށް ކުރިއަށްދާ މި ސަމިޓް ބާއްވަނީ ސަލާމަތީ ގޮތުން ހަރުކަށި ފިޔަވަޅުތަކެއް އެޅުމަށްފަހުއެވެ.
އިސްލާމްއާބާދާއި ރާވަލްޕިންޑީގައި މުޒާހަރާތައް ކުރުމަށް އިދިކޮޅު ޕާކިސްތާން ތަހުރީކޭ އިންސާފު ޕާޓީން ވަނީ އިންޒާރު ދީފައެވެ.
ސަމިޓުގައި ބައިވެރިވާ ގައުމުތަކުގެ މަންދޫބުންނަށް މަރުހަބާ ކިޔުމަށް ދިދައާއި ލައިޓާއި މަލުން އިސްލާމްއާބާދު ވަނީ ޒީނަތްތެރިކޮށްފައެވެ.
އެސްސީއޯގެ ވެރިންގެ ބައްދަލުވުމުގެ ރިޔާސަތު ބަލަހައްޓަވާނީ ޕާކިސްތާންގެ ބޮޑުވަޒީރު ޝެހްބާޒް ޝަރީފެވެ.
ޕާކިސްތާނުން 2023-24 އަށް އެސްސީއޯގެ ވެރިންގެ ރިއާސަތާ ހަވާލުވީ 2023 ވަނަ އަހަރުގެ އޮކްޓޯބަރު މަހު ބިޝްކެކްގައި ބޭއްވި ސަމިޓުގައެވެ.
