ކެނެޑާގެ އެމްބަސީގެ އިސް ޑިޕްލޮމެޓް ސްޓިވަޓް ވީލާ، އިންޑިއާގެ ޚާރިޖިއްޔާއަށް ހާޒިރުކޮށް އިންޑިއާގެ އިހުތިޖާޖު ފާޅުކުރުމަށްފަހު، ކެނެޑާގެ 6 ޑިޕްލޮމެޓުން އިންޑިއާއިން ބޭރުވުމަށް އަންގައިފިއެވެ.
އިންޑިއާއިން މިފިޔަވަޅު އެޅީ، ކެނެޑާގައި ހުންނަވާ އިންޑިއާގެ ހައިކޮމިޝަނަރާއި ކެނެޑާގައި ތިބި އެހެން ޑިޕްލޮމެޓުންނާއި އޮފިޝަލުންގެ ތަހުގީގެއް ހިންގުމަށް ބޭނުންވާ ކަމަށް ކެނެޑާ ސަރުކާރުން އިޝާރާތެއް ކުރުމުންނެވެ. އިންޑިއާއިން ބުނަނީ އަސާސެއް ނެތް ކަމެއްގައި ޑިޕްލޮމެޓުންގެ ގަދަރު ކުޑަވާ ގޮތަށް ކެނެޑާއިން އަމަލު ކުރަނީ ކަމަށެވެ.
"އިންޑިއާ ސަރުކާރުން ނިންމާފައިވަނީ ތިރީގައިވާ ހަ ޑިޕްލޮމެޓުން ވަކިކުރަން: މިސްޓަރ ސްޓިވަރޓް ރޮސް ވީލަރ، އެކްޓިންގ ހައިކޮމިޝަނަރ؛ މިސްޓަރ ޕެޓްރިކް ހެބަރޓް، ޑެޕިއުޓީ ހައިކޮމިޝަނަރ؛ މިސްޓަރ ޕެޓްރިކް ހެބަރޓް، ޑެޕިއުޓީ ހައިކޮމިޝަނަރ؛ މާރީ ކެތަރިން ޖޯލީ، ފަސްޓް ސެކްރެޓަރީ؛ އިއާން ރޮސް ޑޭވިޑް ޓްރައިޓްސް، ފަސްޓް ސެކްރެޓަރީ؛ އޭޑަމް ޖޭމްސް ޗުއިޕްކާ، ފަސްޓް ސެކްރެޓަރީ؛ ޕައުލާ އޮރްޖުއެލާ، ފަސްޓް ސެކްރެޓަރީ،" އިންޑިއާގެ މިނިސްޓްރީ އޮފް އެކްސްޓާނަލް އެފެއާޒުން ނެރެފައިވާ ބަޔާންގައި ވެއެވެ.
"އެ ޑިޕްލޮމެޓުންނަށް އިންޑިއާ ދޫކޮށް ދިއުމަށް އަންގާފައި ވަނީ 19 އޮކްޓޯބަރު 2024 ވާ ހޮނިހިރު ދުވަހުގެ ރޭ 11:59 ގެ ކުރިން،" އެ ބަޔާނުގައި ބުނެފައި ވެއެވެ.
އިންޑިއާއިން ބުނާ ގޮތުގައި ކެނެޑާ ބޮޑު ވަޒީރު މަސައްކަތް ކުރައްވަނީ އިންޑިއާ ސަރުކާރު ނުބައި މީސްކޮށްގެން ސިކު ދަރިކޮޅުގެ މީހުންގެ ވޯޓު ހޯދާށެވެ.
ބޮޑު ވަޒީރު ޓްރޫޑޯ ސަރުކާރުގެ އަމަލުތަކުގެ ސަބަބުން އިންޑިއާ ޑިޕްލޮމެޓުންގެ ސަލާމަތަށް ނުރައްކާވެފައިވާ ކަމަށާއި ކެނެޑާގައި ހުންނަ އިންޑިއާގެ ހައިކޮމިޝަނަރު ސަންޖޭ ކުމާރު ވަރްމާ އާއި އެހެން ޑިޕްލޮމެޓުންނަށް އަމާޒުކޮށްފައިވާ ތުހުމަތުތައް އަނބުރައި ގެންދިއުމަށް އިންޑިއާއިން ގޮވާލާފައި ވެއެވެ.
ކެނެޑާ ސަރުކާރަކީ އިންޑިއާއިން ވަކި ވެގަތުމަށް މަސައްކަތް ކުޜާ ޚާލިސްތާންގެ ސިކުންގެ ޖަމާއަތްތަކަށް ވާގިވެރިވާ ބައެކެވެ. ކެނެޑާގައި މަރާލާފައިވާ ސިކުންގެ ލީޑަރެއްގެ މަރުގެ އަޑީގައި އިންޑިއާ ހައިކޮމިޝަން އޮތް ކަމަށްވެސް ކެނެޑާ ސަރުކާރުން ވަނީ ވާހަކަ ފަތުރާފައެވެ. އިންޑިއާއިން ވަނީ އެއީ އަސާސެއް ނެތް ވާހަކަކތަކެއް ކަމަށް ބުނެފައެވެ.
