އިންޑިއާގެ ޚާރިޖީ ވަޒީރު އިސްލާމްއާބާދަށް ވަޑައިގެންފިއެވެ. މިއީ 9 އަހަރު ތެރޭ އިންޑިއާ ޚާރިޖީ ވަޒީރަކު އިސްލާމްއާބާދަށް ކުރެއްވި ފުރަތަމަ ދަތުރުފުޅެވެ.
ކަޝްމީރު މައްސަލާގައި ގުޅުން ވަޅޯ ވެފައިވާ ދެޤައުމުގެ ދެމެދު ނާދިރު ދަތުރުފުޅުގައި އިންޑިއާގެ ޚާރިޖީ ވަޒީރު އިސްލާމްއާބާދުގައި މަޑު ކުރައްވާނީ 24 ގަޑިއިރަށް ވުރެން މަދު ވަގުތުކޮޅެއްގައި ކަމަށް އިންޑިއާ މީޑިއާއިން ބުނެއެވެ.
މި ދަތުރުފުޅަކީ، ޝެންހާއި ކޯޕަރޭޝަން އޮގަނައިޒޭޝަންގެ ޤައުމުތަކުގެ އިސްވެރިންގެ ސަމިޓްގައި އިންޑިއާގެ ބޮޑު ވަޒީރުގެ ބަދަލުގައި ބައިވެރިވެ ވަޑައިގަތުމަށް ޑރ. ޖަޔަޝަންކަރު ކުރައްވާ ދަތުރުފުޅެކެވެ.
އިންޑިއާއާއި ޕާކިސްތާނުން ބުނެފައި ވަނީ ދެ ޤައުމުގެ ގުޅުމާ ބެހޭ އެއްވެސް މަޝްވަރާއެއް މި ދަތުރުފުޅުގައި ދެފަރާތުން ނުކުރާނެ ކަމަށެވެ.
އެންމެ ފަހުން އިސްލާމްއާބާދަށް ވަޑައިގަތް އިންޑިއާގެ ޚާރިޖީ ވަޒީރަކީ، ސުޝްމާ ސްވަރާޖެވެ.
