ޙިޒުބުﷲ އިން އާންމު ކުރި ވީޑިއޯގެ ނަކަމަށް ދީފައިވަނީ "އެންމެ ފަހުގެ ކެއުން" މިފަދައިންނެވެ. ވީޑިއޯއިން ފެންނަ މަންޒަރުތަކުން، މަތިން ހޯރަ އަޅަމުން ދިޔައީ ހެލިކޮޕްޓަރުތަކެވެ. މަގުމަތިން ސައިރަން އަޅަމުން ދިޔައީ އެމްބިއުލޭންސް ތަކެވެ.
އެތެރޭގެ މަންޒަރުތަކުން، ފެންނަނީ މީހުން ހޭލަމޭލަވަމުންދާ ތަނެވެ. މީސްތަކުންގެ ހަޅޭއްލެވުމާއި މަތިން އުދުހޭ މެޝިންތަކުގެ އަޑާއި ސައިރަންތަކުން ޖައްވު ގުގުމާފައި ވަނީ އައު މެޓަލް މިއުޒިކަކުންނެވެ.
ތަޅުމުގައި ރަތް ކުލައިގެ ފިއްސަކުން ސުރިއަލިސްޓިކް ކުރެހުންތަކެއް ފަވާލާފައިވާ ހެންވެސް ހީވެއެވެ. ތަޅުމުގެ އެހި ހިސާބުން ފެންނަނީ ލޭގެ ކޯރުތައް ބެހިފައިވާ ތަނެވެ. އެކަމަކު އެއީ ކުރެހުންތަކެއް ނޫނެވެ! އެއީ ނުކުޅެދިފައި ތިބި މީހުން ދަމައި، ކުއްތާފައި ގެންދިއުމުން ތަޅުމުގައި އުނގުޅިފައިވާ ލޭތަކެވެ. އަދި ޒަޚަމްތަކާއެކު ޖާނއިގެން ސަލާމަތް ވާން ދެމެމުން ދިޔަ މީހުންގެ ލޭތަކެވެ.
"އެންމެ ފަހުގެ ކެއުން" ނިންމާލީ އިޒްރޭލުގެ އެންމެ އެލީޓް ސިފައިންގެ ތަމްރީނު މަރުކަޒުގައެވެ. ގޯލާން ބްރިގޭޑުގެ ސިފައިން ތިބީ ރޭގަނޑުގެ ކެއުމެއްގައި މަޖާކުރާށެވެ. ގޯލާން ބްރިގޭޑަކީ، އިޒްރޭލު ސިފައިންގެ ތެރެއަށް ވަންނަން ބޭނުންވާ އެންމެން އެ ބްރިގޭޑަކަށް ނިސްބަތްވާން ބޭނުންވާ ފައުޖެވެ.
ޙިޒުބުﷲއިން ދިން ހަމަލާގައި ޒަޔަނިސްޓު ޔަހޫދުންގެ ހަތަރު މީހަކު ޝިކާރަކޮށްލިއެވެ. 60 އެތައް މީހަކު ޒަކަމް ކޮށްލިއެވެ. 15 ކޭހަކީ، އައިސީޔޫއިން އެނދެއް ބޭނުންވި ކޭސްތަކެވެ. ހަސްފަތާލުން ގިނަ މީހުން ނިކުންނާނީ އަމިއްލަ ހާލާއިގެން ނޫޅޭވަރުގައި ކަން ޔަގީނެވެ.
ޙިޒުބުﷲއިން މި ހަމަލަ ދިނުމަށް ބޭނުން ކުރީ ޑްރޯނެކެވެ. "ސައްޔާދު"ގެ ނަމުން ނަން ދީފައިވާ ޑްރޯނެކެވެ. މިއީ ރޭޑާތަކަށް ފިލަމުން އޮޅުވާލަމުން އޭގެ އަމާޒަށް ފޯރި ޑްރޯނެކެވެ.
އިޒްރޭލުގެ ޔެޑިއޮތު ނޫހުގައި ސަލާމަތީ ތަޖުރިބާކާރު ރޮން ބިން ޔަޝާއި ބުނަނީ "ސައްޔާދު 107" ހަމަލަ ދީފައިވަނީ އެ ޙަމަލަ އަމާޒު ކުރުމަށް ޕްރޮގްރާމު ކުރިތަނަށެވެ. އެއީ ފުރިހަމަ އަމާޒެއް ކަމަށެވެ.
ސައްޔާދަކީ އީރާނުގެ އުފެއްދުމެކެވެ. ނަމަވެސް ޙިޒުބުﷲ އިންވެސް އަމިއްލައަށް ސައްޔާދު ޑްރޯން އުފައްދައެވެ. 100 ކިލޯ މީޓަރަށް ސައްޔާދު ދަތުރު ކުރާނީ އަޑެއް ގޮއްވުމަކާ ނުލައެވެ. ހަމަ ލޮލަށް ނުފެންނަ ހިނދު އެސޮރު، ރޭޑާއިން ރެކެންވެސް ދަނެއެވެ.
ނިއުޔޯކު ޓައިމްސްއިން މި ވާހަކަ ރިޕޯޓު ކުރަމުން ބުނެފައި ވަނީ އިޒްރޭލުގެ އެންމެ ބަލި ފަޔަކީ، ޙިޒުބުﷲގެ ޑްރޯންތައް ކަމަށެވެ. އަބްރަހާގެ އެތްތަކަށް އަބާބީލް ޑްރޯންތަކުން ދިން ހަމަލައާ އެއްފަދަ ހަމަލަތަކެއް ޙިޒުބުﷲއިން ދޭ ކަމަށް ޓައިމްސްއިން ބުނެއެވެ.
ޙަމާސްއިންވެސް އަދި ޙިޒުބުﷲ އިން ސާބިތު ކޮށްދީފައި ވަނީ އިޒްރޭލާ އެއްވަރުގެ ބާރެއް ލިބިފައި ނެތްކަމުގައިވިއަސް، ސިއްސުވާލާފަދަ ހަމަލަތައް ދިނުމުގެ ޤާބިލުކަން އެމީހުންގެ ކިބައިގައި އަދިވެސް ހުރިކަމަށެވެ.
