އުތުރު ކޮރެޔާއަށް ނުރައްކަލެއް ކުރިމަތިވެ ހަނގުރާމައަަކަށް ހުށަހެޅިއްޖެނަމަ އަސްކަރީ ގޮތުން އެހީތެރިވެދޭނެ ކަމަށް ރަޝިޔާގެ ޑެޕިއުޓީ ފޮރިން މިނިސްޓަރ އެންދްރޭ ރުޑެންކޯ ވިދާޅުވެއްޖެއެވެ.
ރުޑެންކޯ މިފަދައިން ވިދާޅުވެފައި މިވަނީ ދެކުނު ކޮރެއާ އާއި އުތުރު ކޮރެއާގެ މަސްރަހް ވަރަށް ބޮޑަށް ހޫނުވަމުން އަންނަ ދަނޑިވަޅެއްގައެވެ.
"އުތުރު ކޮރެޔާއާ ދެކޮޅަށް އުދުވާނީ އަމަލެއް ހިންގައިފިނަމަ، ރަޝިޔާގެ ގާނޫނުތަކާ އެއްގޮތަށް ފިޔަވަޅު އަޅާނަން" ރުޑެންކޯ ވިދާޅުވިއެވެ.
ރުޑެންޑޯ އިޝާރާތް ކުރެއްވީ ދާދިފަހުން ރަޝިޔާ އާއި އުތުރު ކޮރެޔާއާ ދެމެދު އެއްބަސްވެވުނު ސްޓްރެޓެޖިކް ޕާޓްނަޝިޕްގެ މުއާހަދާގައި ހިމެނޭ މާއްދާތަކަށެވެ. މިމައްދާތަކަށް ގާނޫނީ ބާރުވެރިކަން ދިނުމަށް ރަޝިޔާއިން ވަނީ އެގައުމުގެ ސްޓޭޓް ޑޫމާއަށް ހުށަހަޅާފައެވެ.
"މުއާހަދާގައި އެ ހުރިހާ ކަމެއް (ކުރިމަތިވާ ނުރައްކަލެއްގައި އަސްކަރީ ގޮތުން އެހީވާންޖެހޭނެ ކަމަށް) ބުނެފައި އޮތީ" ރުޑެންކޯ ވިދާޅުވި އެވެ. "މި ސްޓްރެޓެޖިކް ޕާޓްނަޝިޕުގެ 4 ވަނަ މާއްދާގައި ބުނެފައި ވަނީ، އުދުވާނީ އަމަލުތަކެއް ކުރިމަތިވެއްޖެނަމަ އެއްގައުމު އަނެއް ގައުމަށް އަސްކަރީ ގޮތުން އެހީވާން ޖެހޭނެ ކަމަށް" ރުޑެންކޯ ވިދާޅުވިއެވެ.
އުތުރު ކޮރެޔާއަށް ނުރައްކަލެއް ކުރިމަތިވެއްޖެނަމަ އަސްކަރީ ގޮތުން އެހީވާނެކަމަށް ރަޝިޔާއިން ބުނެފައިވާއިރު، އުތުރު ކޮރެޔާއާ ވާދަވެރި ދެކުނު ކޮރެޔާއަށް އަސްކަރީ ގޮތުން ވާގިވެރިވަމުން އަންނަނީ ރަޝިޔާއާ ވާދަވެރި އެމެރިކާއެވެ.
