ގަދަ ބާރުން ހިފާފައިވާ ފަލަސްޠީނުގެ މިބުގައި ވަޒަންވެރިކޮށްފައިވާ ޒަޔަނިސްޓު ދޮން މީހުން ހިންގަމުން ގެންދާ ޓެރަރިސްޓް އަމަލުތަކާ ހެދި އިނގިރޭސިވިލާތުން ދަތިކުރުމުގެ ފިޔަވަޅުތައް އަޅައިފިއެވެ. އިނގިރޭސި ސަރުކާރުން ވަނީ ހިފާފައިވާ ހުޅަނގު އައްސޭރީގައި ފަލަސްތީނުގެ ރައްޔިތުންނާ ދެކޮޅަށް އަނިޔާވެރިކަން ހިންގާ ހަތަރު ގްރޫޕަކާ ދެކޮޅަށް ދަތިކުރާ ފިޔަވަޅު އަޅާކަން އިއުލާންކޮށްފަ އެވެ.
ޔޫކޭ ފޮރިން ސެކްރެޓަރީ ޑޭވިޑް ލަމީ ވިދާޅުވަނީ، އިޒްރޭލު ސަރުކާރުން ޔަހޫދީންނާ ދެކޮޅަށް ފިޔަވަޅު ނޭޅުމުގެ ސަބަބުން ބިރު ކެނޑި، ވަޒަންވެރި ކޮށްފައިވާ ޔަހޫދީންގެ އަނިޔާވެރިކަން ކޮންޓްރޯލް ނުކުރެވި އިތުރުވަމުންދާ ކަމަށެވެ.
މި ދަތިކުރުމުގެ ފިޔަވަޅުތަކަކީ ފެބްރުއަރީ މަހުގެ ފަހުން ޒަޔަނިސްޓު ޔަހޫދީންގެ އަނިޔާތަކުގައި ބައިވެރިވާ މީހުންނަށް އަމާޒުކޮށްގެން ލަންޑަނުން އަޅާފައިވާ ތިންވަނަ ބުރުގެ ދަތިކުރުމުގެ ފިޔަވަޅުތަކެވެ.
ޔޫކޭއިން ލިސްޓްކޮށްފައިވާ ޖަމިއްޔާތަކަކީ ޒަޔަނިސްޓުންގެ ދީނީ ސްކޫލެއް ކަމަށްވާ އޮޑް ޔޯސެފް ޗައި ޔެޝިވާ އާއި ހާޝޯމަރ ޔޯޝް އެންޖީއޯ އާއި ޗެރިޓީ ޓޮރާޓް ލެޗިމާ އަދި ކޮންސްޓްރަކްޝަން ކުންފުންޏެއް ކަމަށްވާ އަމާނާ އެވެ. އޭގެ އިތުރުން އެމީހުން ހަރަކާތްތެރިވާ އާބާދީތައްވެސް ލިސްޓުކޮށްފައި ވެއެވެ. އެއީ، ތިރުޒާ ވެލީ ފާމް އައުޓްޕޯސްޓާއި، މެއިޓަރިމް އައުޓްޕޯސްޓާއި، ޝުވީ އެރެޓްޒް އައުޓްޕޯސްޓެވެ.
އެމެރިކާއިން ވެސް ވަނީ މިފަދަ ދަތިކުރުމުގެ ފިޔަވަޅުތައް މިއިން ބައެއް އެންޖީއޯއާ ދެކޮޅަށް މީގެ ކުރިން އިއުލާންކޮށްފައެވެ.
