ޓިކްޓޮކް ސަލަފީ އަކީ ޖަރުމަންވިލާތުގައި ދިރިއުޅޭ އަރައްބެކެވެ. އޭނާއަކީ މައްކާއާއި މަދީނާގައި ހައްޖާޖީންނަށް އެހީތެރިވުމަށް ކަމަށް ބުނެ އެހީ ހޯދުމަށް މަސައްކަތް ކުރަމުން ދިޔަ މީހެކެވެ. އުމުރުން 33 އަހަރުގެ ޒުވާނާ މީހުންގެ މެދުގައި ތަޢާރަފްވެ ގެންފައި ވަނީ ޢަބްދުލް ޙަމީދުގެ ނަމުންނެވެ. އޭނާގެ އަސްލު ނަމަކީ، ދަހްރާން އެވެ.
އޭނާގެ އަމަލުތަކާ މެދު ޝައްކުވެގެން ފުލުހުން ތަޙުޤީޤުކުރުމުން އެނގުނީ މިއީ، ދީން ވިއްކައިގެން މަތީފެންވަރުގެ ގެއެއްގައި އަގުބޮޑު ދިރިއުޅުމެއް އުޅޭ މީހެއް ކަމަށެވެ. އަދި އޭނާގެ އަތުން މަރސީޑިސް ކާރަކާއި އަގު ބޮޑު ރޮލެކްސް ދެ ގަޑި ފެނިފައި ވެއެވެ.
މީހުން އަތުން އޭނާ ޚައިރާތަށް ހޯދާފައިވާ ފައިސާއިން ﷲއަށް ޓަކައި ހޭދަކޮށްފައި ވަނީ އެންމެ 5 ހާސް ޔޫރޯއެވެ. 4 ލައްކަ ޔޫރޯ އޭނާގެ އަމިއްލަ ބޭނުމަށް ރައްކާކޮށްފައި ހުއްޓެވެ.
ޖަރުމަން ނޫހުން ބުނިގޮތުގައި ފިލައިގެން ދާން އުޅެނިކޮށް އޭނާ ވަނީ ހައްޔަރުކޮށްފައެވެ. ކުށްތަށް ސާބިތު ވެއްޖެނަމަ، 10 އަހަރުގެ ޙުކުމެއް ލިބޭނެ ކަމަށް ބެލެވެއެވެ.
