ޑެންމާކްގައި އިސްލާމޯފޯބިއާގެ އަމަލުތައް އިތުރު ވަމުންދާތީ ޑެންމާކްގެ ފުލުހުންނާއި ތަޢުލީމީ ދާއިރާގައި މުސްލިމުން ގިނަ ކުރުމަށް ކައުންސިލް އޮފް ޔޫރަޕުން ލަފާ ދިފިއެވެ. މި ލަފާދީފައިވަނީ ޑެންމާކުގައި މުސްލިމުންނަށް ދިމާވެފައިވާ ގޮންޖެހުންތަކަށް އަލިއަޅުވާލާ ފަހުގެ ރިޕޯޓްތަކުގެ އަލީގައެވެ. ޔޫރަޕިއަން އިސްލާމޯފޯބިއާ ރިޕޯޓް 2022 ގައި ފްރާންސް އާއި އޮސްޓްރިއާއާ އެކު ޑެންމާކަކީ މުސްލިމުންނަށް އެންމެ ގޮންޖެހުން ބޮޑު އެއް ގައުމު ކަމަށް ފާހަގަކޮށްފައިވެ އެވެ. ޑެންމާކުގެ ނޭޝަނަލް ޕޮލިހުން 2018 ވަނަ އަހަރު ނެރުނު ރިޕޯޓެއްގައި ބުނެފައިވާ ގޮތުގައި ޑެންމާކުގައި ދީނީ ގޮތުން ނަފްރަތު އުފެއްދުމުގެ ކުށުގެ ރެކޯޑް ކުރެވިފައިވާ 112 ޖަރީމާގެ ދެބައިކުޅަ އެއްބައި ޖަރީމާ އަމާޒުކޮށްފައި ވަނީ މުސްލިމުންނަށެވެ. ނަސްލީ ތަފާތުކުރުން ބޮޑުވެފައިވާ ދަނޑިވަޅެއްގައި، ތައުލީމީ މުއައްސަސާތަކާއި ގާނޫނު ތަންފީޒުކުރާ އިދާރާތަކުގައި އިތުރު މުސްލިމުން ވަޒީފާއަށް ނެގުމަށް ކައުންސިލް އޮފް ޔޫރަޕް (ސީއޯއީ) އިން ޑެންމާކުގެ ކަމާބެހޭ ފަރާތްތަކަށް ވަނީ ގޮވާލަފައެވެ.
ބައިނަލްއަގްވާމީ އިންސާނީ ހައްގުތަކާ ބެހޭ ޖަމާއަތުން ޑެންމާކަށް އިލްތިމާސްކޮށްފައި ވަނީ ނަސްލީ ތަފާތުކުރުމާ ދެކޮޅަށް ގައުމީ ފިޔަވަޅު އެޅުމުގެ ޕްލޭނެއް އެކުލަވާލުމަށެވެ.
ގައުމީ ބްރޯޑްކާސްޓާ ޑީއާރު ބުނާ ގޮތުގައި އެކްޝަން ޕްލޭންގައި "މުސްލިމުންނާ ދެކޮޅު ނަސްލީ ތަފާތުކުރުމާއި ތަފާތުކުރުން ހުއްޓުވަން" ވެސް ކައުންސިލުން ލަފާދީފައިވެ އެވެ.
ކުރީގެ ޑެންމާކުގެ ސަރުކާރުން ނަސްލީ ތަފާތުކުރުންތަކާ ދެކޮޅަށް އެކްޝަން ޕްލޭނެއް އެކުލަވާލީ 2022 ވަނަ އަހަރު ޕާލަމެންޓްގެ އިއްތިފާގުން ފާސްކުރުމުންނެވެ. އެކްޝަން ޕްލޭން ފެށުނުތާ މިހާރު ދެ އަހަރު ވެއްޖެ އެވެ.
