ޗައިނާއާ ޖެހި އެމެރިކާގެ ނުފޫޒު ފަނޑުވަމުން ދާކަމަށް ނިއުޔޯކު ޓައިމްސްއިން ބުނެފިއެވެ. ނިއުޔޯކު ޓައިމްސްއިން ބުނާ ގޮތުގައި އެމެރިކާއަށް ޤައުމުތަކުގެ ތަރައްޤީއަށް ކޮށް ނުދެވެ ކަންކަން ކޮށްދީގެން ޗައިނާ އިން ދަނީ ޤައުމުތަކުގެ ދިރިއުޅުމުގެ ފެންވަރު މަތިކޮށް އާމްދަނީ އިތުރުވާ ގޮތް ހަދައިދީ މީހުންގެ ހިތްތައް ފަތަހަ ކުރަމުންނެވެ.
ޗައިނާއިން އެމެރިކާގެ ނުފޫޒު ކުޑަ ކުރުމަށް ގެންގުޅޭ މުހިންމު ސިޔާސީ ވިސްނުމަކީ ބެލްޓް އެންޑް ރޯޑްގެ މަޝްރޫޢުތައް ހިންގުމެވެ. މިއީ އިޤްތިސާދީ ގޮތުން ޤައުމުތަކަށް ފައިސާ ދިނުމާއި މަޝްރޫޢޫތައް ހިންގުމުގެ ފަލްސަފާއެކެވެ.
ދެ ވަނަ ބޮޑު ހަނގުރާމައަށްފަހު، ޔޫރަޕްގެ ޤައުމުތަކާއި ޖަޕާނާއި ޚާއްސަކޮށް ޖަރުމަންވިލާތް އަމިއްލަ ފައިމައްޗަށް ތެދުވުމަށް އެމެރިކާއިން މާޝަލް ޕްލޭންގެ ނަމުން މާލީ އެހީތައް ވެ ދިނެވެ. އެފަދަ އެހީއެއް އެމެރިކާ ފުށުން ތަރައްޤީ ވަމުން އަންނަ އެހެން ގައުމުތަކަށް ވެދީފައެއް ނުވެއެވެ. ނަމަވެސް އެމެރިކާއަކީ ބައިވެރިންނާއެކު ބައިނަލްއަޤްވާމީ ސިޔާސަތުގައި ނުފޫޒު ހިންގޭ އަދި މީޑިއާ ބޭނުންކޮށްގެން ބޭނުންވާ ޤައުމެއް ނުބައި މީސްކޮށް، ސަރުކާރުތައް ފުރޮޅާލައި ފިތުނަ އުފެއްދުމުގެ ޤާބިލުކަން އޮތް ބާރެއްކަމުން އެމެރިކާއިން ވަނީ އެ ރޮގުން ޤައުމުތައް މިހާތަނަށް ކޮންޓްރޯލުކޮށް ފައެވެ. ނަމަވެސް އދގައިގެ މާލަމްތަކާއި ދުނިޔޭގެ ޤައުމުތަކުން ޕޯޑިއަމްތަކުގައި އެމެރިކާއަށް ސާފުބަހުން ރައްދުކުރަމުންދާ ބަސްތަކުން އެނގެނީ އެމެރިކާގެ އޮފް ކެޑިފައިވާ ކަމެވެ. އަދި އެމެރިކާގެ އަމިއްލަ މީޑިއާއިން ބިތު ފަންގި ނެގުމުން އެމެރިކާއަކީ އެބުނާ ބޮޑު ޑިމޮކްރެސީ ނޫން ކަންވެސް ދުނިޔޭގެ މީހުންނަށް މިހާރު ވަނީ ޔަގީން ވެފައެވެ.
ހިރޮޝިމާއަށް ބޮންއަޅައި ނަސްލެއް ސާފުކޮށްލި މީހުންނަކީ އިރާޤްގެ އަބޫ ޢުރެއިބު ޖަލުގައި މުސްލިމު ކުށްވެރިންގެ ބޮލަށް ފަހަރުވަ ލީ މީހުންނެވެ. އަދި ގުއަންޓަނާމޯއަކީ އެމެރިކާގެ އަނިޔާވެރިކަމުގެ ފަންނުވެރިކަމުގެ ނަމޫނާއެކެވެ!
ޗައިނާއިން ބެލްޓް އެންޑް ރޯޑް އިނިޝިއޭޓިވް (ބީއާރުއައި) ފަށާފައި ވަނީ 2013 ވަނަ އަހަރުއެވެ. ޗައިނާގެ ރައީސް ޝީ ޖިންޕިން ފަށްޓަވައި ދެއްވި ބީއާރްއައި ވެގެން ދިޔައީ ދުނިޔޭގެ ބޮޑު އިންފްރާސްޓްރަކްޗާ މަޝްރޫއުތަކުގެ ނަމޫނާއަކަށެވެ.
ބީއާރުއައި އެންމެ ފުރަތަމަ ތައާރަފްކުރީ ބޯދާ ޒަމާނުގެ ސިލްކް ރޯޑް ގައި ހިމެނުނު އިޤްތިސާދާއި ވިޔަފާރީގެ ބައިވެރި ސަރަހައްދުތައް ހިމަނައިގެން ކަޒަކިސްތާނުން އެއްގަމު މަގުން ޗައިނާ ގުޅުވާލުމަށެވެ. އެއަށްފަހު އިންޑޮނޭޝިއާއިން ޗައިނާއާ ގުޅުވާލުމަށް ކަނޑަށް ނިސްބަތް ކޮށް، މެރިޓައިމް ސިލްކް ރޯޑް ފެށިއެވެ.
މިދިޔަ އަހަރުތަކުގެ ތެރޭގައި ޗައިނާއިން ހިންގި އިންފްރާސްޓްރަކްޗަރަލް ޑިވެލޮޕްމަންޓް ސްޓްރެޓެޖީ ވަނީ ފުޅާވެގެން ގޮސްފައެވެ. ޖުލައި 2023 ގެ ނިޔަލަށް ޗައިނާގެ ރަސްމީ ލިޔުންތަކުން ދައްކާ ގޮތުގައި ޗައިނާއާއެކު 149 ގައުމެއް ވަނީ ބީއާރްއައިއިން ގުޅިފައެވެ.
ތަރައްޤީ އެންމެ ކުޑަކޮށް ވެފައިވާ ސަބް ސަހަރާ އެފްރިކާގެ 44 ގައުމަކީ ބީއާރުއައިގެ ބައެކެވެ. މިއީ އެމެރިކާއާއި އިސްތިއުމާރީ ބާރުތަކުން އެބައެއްގެ މުއްސަނދިކަން ފޭރިގަނެ ފަގީރުކަމުގައި ތާއަބަދަށް ބާއްވަމުން ދިޔަ ޤައުމުތަކެވެ.
ބީއާރުއައިގެ ފުރަތަމަ މަގުސަދަކީ އިގްތިސާދީ ތަރައްގީ އާއެކު ޗައިނާއާ ޤައުމުތައް ގުޅުވާލުމެވެ. ބީއާރުއައި އަކީ ޗައިނާއިން އެތައް ޤައުމަކާ ގުޅުވައިގެން ހިންގާ ޖިއޮސްޓްރެޓެޖިކް ސިޔާސަތުގެ މުހިންމު އެއް ބައެވެ.
ބިއާރްއައިއާއި ޤައުމުތަކުގެ ވެރިކަމުގެ ނިޒާމާ ގުޅުވުމަށް މަސައްކަތްތަކެއް ކުރެވެއެވެ. އެ ވާހަކަތަކަށް ބަލައި، އެއިން ބައެއް ޤައުމުތަކަށް ނަޒަރު ހިންގާލާއިރު އެމެރިކާގެ ރައްޓެހިކަމުގައި އޮތް އިރަކަށް ވުރެން އެގައުމުތަކުގެ ވެރިކަމުގެ ނިޒާމު އިތުރަށް ބަލިކަށި ވެފައެއް ނުވެއެވެ. ނަމަވެސް ކެންޔާއާއި ޒެމްބިއާފަދަ ބައެއް ޤައުމުތައް އެމެރިކާގެ ރަހުމަތްތެރިކަމުގެ ދުވަސްވަރަށް ވުރެން ވެރިކަމުގައި މިހާރު މާބޮޑަށް ރަނގަޅު ކަމަށްވެސް ދައްކައެވެ. ޕާކިސްތާނަށް ބަލާއިރު ޕާކިސްތާނުގެ ނިޒާމު އަދިވެސް އޮތީ ކުރިންވެސް އޮތް ގޮތަށެވެ. ސިފައިންގެ އަތް މަތީގައެވެ!
އެހެންވެ، އެމެރިކާއިން ދައްކަން އުޅޭ ގޮތާ ޚިލާފަށް ބީއާރްއައިގެ ސަބަބުން ޤައުމުތަކުގެ ވެރިކަމުގެ ނިޒާމު އިތުރަށް ޚުދު މުޚުތާރު ވެފައެއް ނުވެއެވެ. ނަމަވެސް ޤައުމުތައް މުއްސަނދިވެ، އަމިއްލަ ފައިމައްޗަށް ތެދުވެވޭ ގޮތް ވީއެވެ.
